КУИМ ПРАТЯ ГЕЗ

Важкуаын (Кулӧмдін карулын) таво видзӧ пырӧмтӧ водзджык празднуйтісны куим пратя гез: ЕПО-ысь приказчик, сэні тшӧт вӧчысь (счетовод), милиционер.

Вӧскресенньӧӧ (март 2-ӧд лунӧ) локтасны зэв уна йӧз: коді карасинла, коді мукӧдторла, сэсся ЕПО-ӧ воас груз. Виччысясны-виччысясны, приказчик абу.

— Кӧнӧсь нӧ тӧргуйтысьясыс? — юасьӧны.

— Роч сиктын видзӧ пырӧны...

Вӧлӧмкӧ, збыль видзӧ пырӧмаӧсь. Приказчикыс счетоводыскӧд косясьӧма (тышкасьӧма), милиционер дорйысьӧма (дерт, сы вылӧ и милиционер!), кок йылас вӧлӧм оз ӧшйы...

Сэсся тыртӧм карасин дозъясӧн йӧзыдлы бӧр лои разӧдчыны.

Мужикъяс сэні сёрнитӧны:

— Зонмӧ, пиӧ, век жӧ кодӧсь найӧ, куим пратя гезйыд. ЕПО-лӧн тырмӧ самӧкур вылад эмбурыд, ми тай небось шпал помсьыд огӧ юӧ...

Тӧндзи вӧлі сідз жӧ Нардомын куим друг «гажӧдчӧмаӧсь», косявлӧмаӧсь дӧрӧмнысӧ весиг. Аскинас сэсся йӧзыд и «нимкодясьӧны»:

— Ок, ёна и гажа вӧлі тӧрыт Нардомын! Кык приказчик — Педьӧ Миш Вась да Степан Митрей — да милиционер ёна и кодалісны!.. Аттӧ, бур жӧ миян милиционерным! Оз кутась самӧкурсьыд, ачыс сутки виччысяс войтӧданінас!..

«Бур» и эм! Колӧ эськӧ ставнысӧ вина-раб пытшкас увлань юрӧн сюйлыны.

Лямпа.