ГИЖӦЙ СӦМЫН ЗБЫЛЬӦС

Быд гижӧдысь газет мыжа. Газет лыддьӧны уна йӧз. Колӧ гижны газетӧ пыр збыльтор. Гижан кӧ лӧжӧс, йӧзыд бергӧдчасны газетсьыд, оз кутны веритны гижӧмад, дугдасны газет лыддьӧмысь.

Унаысь овлывлӧ тадзи: кодкӧ деревнясянь гижас мыйкӧ омӧльтор (буртор вылад озджык некод кутчысь); видзӧдан да, недыр мысти сэтісянь воас «опроверженньӧ» — «эз пӧ нинӧм сідзи вӧв, сійӧ пӧ лӧж»...

Мукӧддырйиыс, дерт, гашкӧ, вочатӧ кодкӧ прӧста гижас, асьсӧ дорйӧм кузя. Корсюрӧ збыль вӧлӧм неладнӧ гижӧма, кывлӧм серти, йӧз сёрни (слух) кузя, — кватитчан кӧ, абу сідз вӧлӧма. Тадзи абу лӧсьыд. Ӧти-кӧ, гижысьыс вермас судӧ сюрны; мӧд-кӧ, газет вылӧ кутасны лёка видзӧдны.

Быд гижӧдысь суд водзын мыжмӧ гижысьыс. Шуам: Иванов гижӧма Петров йылысь мыйкӧ лёкӧс, мый абу сідзи вӧлӧма збыльысьсӧ. Петров вермас Ивановӧс судӧ сетны. Гашкӧ, Ивановыс эськӧ абу пасйӧма ассьыс овсӧ гижӧд улас, кырымасьӧма мӧд ногӧн (псевдоним), суд вермас газетсянь корны явитны гижысьсӧ — сы вӧсна газет некор оз печатайт статьяяс, абу кӧ гижысьыс индӧма ассьыс адрессӧ.

Сэсся газетӧ гижӧм статьяяс кузя вермасны мыждыны весиг судӧ норасьтӧг (делӧ панны вермӧны прокуроръяс, следовательяс).

Оз ков вунӧдны: газет миян «официальный орган» Обисполкомлӧн. Мыйкӧ кӧ гижӧма, ставыс петӧ «официально» (Сӧвет власьтсянь, тшӧтш Коммунист партиясянь).

Та вӧсна ми шуам: гижӧй газетӧ сӧмын збыльторъяс, гижӧй ёна думайтӧмӧн!