АВТОБИОГРАФИЯ

Коді видзӧдліс миян республика карта вылӧ, сійӧ тӧдӧ, мый картаыслӧн мыгӧрыс паськыд ёді кодь, сӧмын гӧрбыс тайӧ ёдіыслӧн абуджык шыльыд да кынӧмас пӧкйыс унджык. И бӧж йылыс росмыштӧма, но тайӧ нин сы вӧсна, мый Полярнӧй круг саяд ёнджыка кӧдзыд, да коньӧр бӧж коркӧ кынмыштлӧма. А юрыс медся лунланяс, и сылы мый вермас лоны? Ставыс лючки-ладнӧ.

«Ёділӧн» самӧй ныр йывсянь заводитчӧ Мураш тракт да Луз ю. Найӧ первойсӧ войланьӧ мунӧны ӧтув, сэсся ю крутӧя кусыньтӧ рытыввылӧ, а тракт котӧртӧ водзӧ — Луз районсянь вуджӧ Сыктылӧ. Ю да тракт торъяланінас — Занулье сиктын — ме и чужи 1906 вося декабрь 30 лунӧ важ стиль серти.

Батьӧй — крестьянин. Семья миян вӧлі ыджыд: мам да бать, ми сизим чоя-вока да дядь гозъя. Бӧрынджыкнас чукӧрмылім дас нёль мортӧдз.

Нёль пи лыдын ме вӧлі медся воддзаыс да, сідзкӧ, медся коланаыс: вит арӧссянь куті видзны кага, сизимсянь — мӧсъяс, кӧкъямыссянь — ытшкыны, колльысьны, ӧкмыссянь — унатор вӧчны. А чери, ур да пӧтка кыйны — ог тӧд кутшӧм восянь заводиті, дерт, первойсӧ батькӧд ветлывлі, «тӧварыш» пыдди...

Челядь кадӧ велӧдчи нёль во: кыксӧ важ власть дырйи, мӧд кыксӧ революция бӧрын. Тешкодь ӧд? Важ школаад велӧдісны рочӧн, весиг ас костын коминад сёрнитны эз позь. Учительница юалӧ миянлысь: «Как говорит корова?» Колӧ эськӧ шуны: «Му-у-у!» А ми, нинӧм гӧгӧрвотӧмъясыд, вочавидзам: «Ба-а-а!» Мӧскыд ӧмӧй муксылӧ коркӧ? Сійӧ век нин баксылӧ. Но баксӧ кӧть оз, а учительница киын кыз линейка пыр вӧлі дась колскӧбтыны шырӧм юръясным кузя.

Зонмалан кадӧ лои гажаджык. 1926 воын миян сиктын первойысь на котыртчис комсомольскӧй ячейка. Секретарнас бӧрйисны менӧ. А мӧд вонас ыстісны Сыктывкарӧ велӧдчыны совпартшколабердса курсъяс вылӧ. Сэні велӧдчи во джын. Во-мӧд-коймӧд олі гортын — уджалі бать овмӧсын, кыйси, вӧр лэдзи, леснӧй объездчикӧн вӧлі. Но велӧдчыны кыскис — терпенньӧ абу. 1930 вося арын бара локті Сыктывкарӧ да пыри велӧдчыны кык вося дорожно-мелиоративнӧй курсъяс вылӧ. Тӧвсӧ велӧдчи, гожӧмсӧ ветлӧдлі кылӧдчан юяс тӧдмалӧм кузя практика вылын.

Курсъясыс лыддьыссисны индустриальнӧй техникум бердын, директорнас техникумас вӧлі И. И. Сажин (Ичӧт Иван), гижавліс да печатайтліс рассказъяс. Тайӧ 1931 вонас ме заводиті жӧ гижны стихъяс да негырысь рассказъяс. Ичӧт Иваныд и шуӧ: тэныд пӧ колӧ ыджыдджык школаын велӧдчыны, ыстам плановикъяслӧн курсъяс вылӧ. Ме и шуа Сажиныдлы, мися, ті менӧ лучшӧ ыстӧ вузъясӧ дасьтан курсъяс вылӧ. А суӧдан пӧ: найӧ ӧд кык тӧлысь нин велӧдчӧны? Суӧда, мися. Сажин гижыштіс рекомендация, и ме котӧрӧн муні тайӧ курсъяс вылӧ. Сэні велӧдчӧм бӧрын пыри Сыктывкарса пединститутӧ, кодӧс помалі 1937 воын. Институтас велӧдчигӧн гижи «Дінъёльса вӧрпункт» повесть. Уджавны мӧді первойсӧ «Вӧрлэдзысь» газетын, сэсся миян республикаса писательяс Союзын. 1948 восянь гижан удж вылын.

Ӧні кежлӧ менам лои гижӧма: «Алӧй лента» да «Тундраса бияс» романъяс, «Дінъёльса вӧрпункт» да «Биа нюр» повестьяс, «Герой йылысь сказ» поэма, а сідз жӧ пьесаяс, рассказъяс, очеркъяс, стихъяс.