ВИТ ВО КОМИНТЕРНЛЫ

Талун тырӧ вит во Коминтерн уджалӧмлы. Коминтерн лоӧ — Коммунистическӧй Интернационал — Ставмувывса коммунистъяслӧн ӧтувтчӧм. Тайӧс лӧсьӧдны шуис покойнӧй Владимир Ильич Ленин.

Коминтерн индалӧ ставмувывса рабочӧйяслы туй, кыдзи колӧ вермасьны буржуйяскӧд-капиталистъяскӧд. Ӧтувтӧ, чукӧртӧ рабочӧйясӧс, мед ӧтвылысь чорыда чабыртны голяӧдыс мувыв озыръясӧс, регыдджык путкыльтны налысь власьт, мездыны уджалысь йӧзӧс быдлаысь.

Вит воӧн Коминтерн ёна нин ӧтувтіс рабочӧйясӧс. Быдлаын нин тӧдӧны: Коминтерн чуксалӧ став уджалысь йӧзсӧ ӧтувтчыны коммунист партия гӧгӧр, шыбитны ас вылысь озыръясӧс-нартитысьясӧс, лӧсьӧдны став му пасьтала Сӧвет власьт. Прӧста ӧд оз жалитны быдлаын рабочӧйяс Ленинӧс, Коминтернын медводдза нырнуӧдысьӧс. Прӧста ӧд оз тіравны быд государствоын озыръяс коммунистъясысь. Озыръяс тӧдӧны: коммунист партия коркӧ жугӧдас-помалас найӧс!

Медбур памятникыс Ленинлы лоӧ — ставмувывса уджалысьяслӧн вермӧм ставмувывса озыръясӧс.

Мед быдмас, ёнмас, пыр вермас Ленинлӧн быдтасыс — Коминтерн!

Мед регыдджык лоас Ставмувывса Сӧвет Республика!