ВЕЛӦДӦМ ПЫДДИ ДЗУГӦ

Отйын (Коквицы) эм театрын ворсысь чукӧр (кружок). Нардомас кӧсйӧмаӧсь 10-ӧд лунӧ февральын ворсны коми пьеса «Коді мыжа». Вежон войдӧр сетӧмаӧсь ӧти ворсысьлы — велӧдысь Турбылёвлы — билетъяссӧ спектакль вылас вузавлыны.

— Кык лунӧн пӧ ставсӧ инала! — шуӧма Турбылёвыд. — Ог кӧ пӧ инав — водзвыв бӧр вая билетъяссӧ.

Ворсан лунӧдзыс сэсся Турбылёв нинӧм абу казьтывлӧма билетъяс йывсьыд. Ворсан рытнас нин сэсся вайӧма бӧр став билетсӧ, весиг ӧтикӧс абу вузавлӧма!..

Турбылёвыс ачыс босьтліс ворсны пьесаас тшӧтш (Морозовлысь рольсӧ). Сэсся ворсӧм водзвылас друг шуис.

— Ме пӧ ог ворс!

Зэв ёна эськӧ кевмысим да, нинӧм эз ло: «Ог дай пом!» Лои мырдӧн-сорӧн мӧдӧс корсьны.

Татшӧма уджалӧмысла (велӧдысь, комсомолеч, театр кружокын шлен) Турбылёвӧс лои кружоксьыс асьсӧ «турбыльтны»-вӧтлыны да та йылысь йӧзавны газет пыр. Оз ков миянлы сэтшӧм мортыд, коді дзугӧ йӧзӧс югдӧдан уджсӧ!

Кружоклӧн правленньӧ.