ГИЖӦЙ КОМИ ГАЗЕТӦ

Куим тӧлысь нин петӧ «Югыд туй» газет комиӧн (кыкысь быд вежонын). Сӧмын зэв этша воӧ газетлы коми гижӧдыс деревняяссянь. Унджыкыс воӧ рочӧн гижӧмъяс. Мукӧдыс рочнад гижасны, сэсся гижӧд помас пасйыштасны: «Возместите мой письмо поскоднее зырянском языке»... Кӧсйӧма эськӧ, дерт, шуны рочӧн: «Поместите мою статью поскладнее (т. е. после исправлений) на зырянском языке», сӧмын нинӧм абу артмӧма-а. Мукӧд татшӧм «роч» статьясьыд весиг он гӧгӧрво, мый йылысь гижӧма. Рад эськӧ кӧть комиӧн «возместитан» да... Унджыксӧ ӧні аслым (ӧтнамлы) и лоӧ коми газетад гижны: кодсӧ комиӧн, кодсӧ (гӧгӧрвоана кӧ) роч гижӧд вылысь лӧсьӧдны.

Коми деревнясянь рочӧн гижысьяс шуӧны: «Оз пӧ коминас артмы». Ме ог верит. Комиӧн кӧ кужӧ сёрнитны да вермӧ гижны (рочӧн), сійӧ вермас гижны и комиӧн, гижас бурджыка рочӧн дорысь. Гашкӧ, коми букваяссӧ оз тӧд — сійӧ абу дивӧ. Мед гижас роч букваясӧн, либӧ сорӧн-сорӧн, кыдзи вермас. Сӧмын ме водзвыв шуа: ичӧтика велӧдчӧм коми морт бурджыка гижас комиӧн, гӧгӧрвоан сэки лючки, мый кӧсйӧма шуны гижӧднас. Оз ков повны — неладнӧ пӧ лоӧ, сераласны.

— Некод оз серав. Кыті неладнӧ артмас — тані шыльӧдам-мольӧдам, быдлаті ладнӧ лоас. Надейнӧ эськӧ коминад некор эз гиж «возместите»-тӧ либӧ «поскоднее». Кытыськӧ мортыд кывлӧма коркӧ «поместите» да «поскладнее», сэсся коми газетад «рочӧн» и кульыштӧма...

Гижӧй комиӧн, прӧста, энӧ вывті ёна мукльӧдлӧ гижӧд кывъяснаныд. Коми деревняясын сёрнитанныд, мӧвпаланныд комиӧн, мыйлакӧ сэсся гижанныд роч нисьӧ комиӧн, нинӧм прамӧя он гӧгӧрво.

Со тай нӧ, видзӧдлӧй талун, ӧти деревняса морт С. К. гижӧма комиӧн; унджык букваясыс, весиг уна кывъясыс рочӧсь, да гӧгӧрвоан.

Сэсся оз позь ёна ошкыны гижысьясӧс миян Сыктывдінкарысь. Бура унаӧн эмӧсь тані, зэв бура эськӧ кужӧны гижны комиӧн, сӧмын некод нинӧм оз гиж. Позьӧ весиг нимъяснысӧ пасйыны (оз кӧ кутны гижны, лоӧ пасйыны!)...

Абу лӧсьыд! Сёрни выланыд пыр зілянныд: коми кыв паськӧдны колӧ, комиӧн колӧ быд газет, журнал лэдзны. Сы пыдди сэсся ланьтінныд — нинӧм онӧ гижӧй, рочӧн кындзи! Тадзнад непӧштӧ быд лун коми газет лэдзны, весиг кыкысь вежоннас регыд оз кут петны: ӧти мортлӧн вын оз судзсьы быдлаӧ. Кыланныд! Гижӧй коми газетӧ!