ПАЛЬӦДЧӦЙ!

Кымынысь нин гижлім-чуксасьлім газет пыр:

— Бырӧдӧй самӧкур!

— Эновтӧй пеж зелля вӧчӧм!

Нинӧмтор, буракӧ, оз мӧрччы; тыдалӧ, пыдӧдз пырӧма «виж змейлӧн» гыжйыс йӧз сьӧлӧмӧ. Тӧкӧтьӧ быттьӧ лӧньыштны нин заводитліс Коми муын самӧкур юӧм. Вӧлӧмакӧ, прӧстӧй надейтчӧм! Газетӧ быд лун воӧны зэв омӧлик юӧръяс:

— Быд пельӧсын Коми му пасьтала тшынасьӧны — самӧкур вийӧдӧны.

— Ойдны кутіс самӧкурӧн Коми му.

— Пӧдны кутім!..

Со кутшӧм лёк гижӧдъяс миянлы воӧны!

Юӧны праздникъясӧ, юӧны весьлунъясӧ, юӧны мужикъяс, бабаяс, том зонъяс-нывъяс, весиг посни челядь; юӧны прӧстӧй йӧз, юӧны служакъяс, юӧны каръясын и сиктъясын. Быдӧн дорвыв дуньгӧны пеж юантор. Некӧн дугдӧмыслӧн пом ни дор оз тыдав!..

Самӧкур помысь став омӧль олӧмыс: гӧльлуныс, висьӧмыс, косьыс, матьыс, морт виӧмыс, быдсяма лёкыс. Судӧ мунысьыс мыйта! А шогыс, синваыс мамъяслӧн, челядьлӧн юысь батьяссянь!..

Тадзи овны оз позь!

Бур кывйыс кӧ оз инась йӧз сьӧлӧмӧ, дубалӧма нин кӧ самӧкурнас йӧзлӧн юр вемыс, колӧ власьтлы кутчысьлыны да чорыда-чорыда пыркнитны кода юръясысь самӧкур чадсӧ!

Медвойдӧр бырӧдны юӧмсӧ служакъяс костын, мед найӧ вермисны сэсся кутчысьны мукӧдъяс дорӧ. Юысь служак некор оз вермы мукӧдӧс дугӧдны юӧмысь, сылы йӧзыд пыр и чуткасны синмас, шуасны:

— Ачыд нӧ мый керан? Тэ служак морт юан, а миянлы позьӧ нин!..

Колӧ чорыда босьтчывны вермасьны самӧкуркӧд. Колӧ дзикӧдз орӧдны юрсӧ виж змейлысь, мед некор нин сэсся эз вермыв кыпӧдчыны!

Милициялы, исполкомъяслы, став удж нуӧдысьяслы, служакъяслы, став веськыд (честнӧй) йӧзыслы колӧ ӧтвылысь тупкавны Коми муысь самӧкур тшын петанінъяссӧ!

Пальӧдчӧй, коми войтыр! Тӧлӧдӧй вина чадӧн прӧймитӧм юр вемнытӧ! Самӧкур помысь бур олӧм энӧ виччысьӧй!