БУР ОЛӦМЛАНЬ СЕТЧӦНЫ

(Кӧджпонын)

Вӧскресенньӧӧ (февраль 17-ӧд лунӧ) Кӧджпонын вӧлі крестьяналӧн чукӧртчылӧм. Сёрнитісны Комитет Взаимопомощи йылысь. Сёрнитӧм бӧрын шуисны: Комитет взаимопомощи лӧсьӧдны, быд керка юрысь мынтысьны сэтчӧ кӧкъямыс пунт сюӧн. Чукӧртӧм няньсӧ сетны Кӧдзвывса Исполкомӧ; Кӧдзвыв вӧлӧсьтувса комитетыскӧд ӧтувтчыны.

Мӧд сёрни вӧлі школаӧ да сиктса сӧветӧ кер вайӧм йылысь: кӧсйӧны школасӧ да сиктса Исполкомсӧ ӧбшывайтны. Сы йылысь шуисны: кер билет ньӧбны нянь вылӧ — няньыс эм сиктса сӧветын. Сійӧ няньсӧ чукӧртлӧмаӧсь общественнӧй видзьяс пуктӧмысь. Керсӧ вайны медалӧмаӧсь со мый вылӧ: колян во поплысь муяс мырддьывлӧмаӧсь, сійӧ муяссӧ кӧдзлӧмаӧсь став сиктнас ӧтвылысь ас кӧйдыснаныс, сэсся сійӧ урожайсӧ босьтӧмаӧсь дай медалӧмаӧсь вӧр вайны.

Со кутшӧм бур уджъяс вӧчӧны Кӧджпонсаыд.

Мукӧд сиктъяслы да деревняяслы сідз жӧ колӧ заводитны уджавны, бур вӧчны. Сэтшӧм уджыд ӧд некытчӧ оз вош, ставыс сійӧ аслыд лоӧ.

Сэсся сы бӧрын Обсуд шефлӧн ыстӧм йӧз висьтыштісны: кутшӧма вӧлі олӧны крестьяна важӧн сар дырйи, войнаяс дырйи, кыдзи олӧны ӧні, кыдзи Сӧвет власьт быд ногӧн кокньӧдӧ да отсалӧ крестьяналы. Сэтшӧм сёрнияссӧ, висьталӧмъяссӧ Кӧджпонса зэв ёна кывзӧны.

Слудаса Степӧ.