НЫВБАБАЯС, ЭНӦ ВУНӦДӦЙ ЛЕНИНЛЫСЬ ВЕЛӦДӦМ!

Ленин унаысь шуліс:

— Сӧвет власьт оз ло помӧдз нуӧдӧма, оз кӧ нывбабаяс тшӧтш сибавны Сӧвет удж дінӧ.

Сӧвет власьт нывбабаясӧс ӧткодяліс мужикъяскӧд. Нывбабаяслы воссис туй ӧтвылысь став уджалысь йӧзыскӧд кыпӧдны олӧм. Нывбабаяслы быдлаӧ ӧні восьса ӧдзӧс. Найӧ делегатскӧй собранньӧяс пыр вӧчӧны ыджыд удж Сӧвет власьтлы. Нывбабаяс уджалӧны Коммунист партияын, Сӧветъясын, профсоюзъясын, кооперативын, Комитет Взаимопомощиын — быдлаын. Нывбаба уджалысьяс воысь воӧ пыр содӧны. Воысь воӧ найӧ тӧдмалӧны мӧдногса олӧмсӧ, югдӧдалӧны вежӧрнысӧ, эновтӧны важногса лёк олӧмсӧ.

Дас вит лун мысти (8-ӧд лун мартын) лоӧ «Ставмувывса нывбабаяслӧн ӧтувтчан лун».

Коми нывбабаяслы колӧ нин ӧнісянь сэк кежлӧ лӧсьӧдчыны. Во гӧгӧрнас ӧтчыд овлӧ тайӧ луныс, нывбабаяслӧн «Ыджыд луныс»!

Колӧ тайӧ луннас петкӧдлыны, ёна-ӧ вермисны нывбабаяс велӧдчыны, ӧтувтчыны, выльлань мунны.

Колӧ быд вӧлӧсьтын, быд сиктын нывбабаяслы чукӧртчывны собранньӧ вылӧ, тшӧтш исполкомъяскӧд, профсоюзъяскӧд, кооперативъяскӧд, партиякӧд. Нывбабаяслы колӧ тайӧ луннас корны Сӧвет пыр, мед бурджыка босьтчасны кутны челядь видзанінъяс (ясли, детские дома, сады и прочее), мед выльысь ещӧ восьталасны.

Коми крестьянкаяс, энӧ вунӧдӧй Ленинӧс! Велӧдӧй, кесйӧдлӧй ассьыныд челядьнытӧ мунны Ленин индӧм туй кузя!

Велӧдчӧй асьныд тшӧтш! Бырӧдӧй пемыдлун!

Казьтыштӧй тшӧтш асланыд праздник лунӧ мукӧд (озыр) государствоясын мучитчысь уджалысь йӧзӧс (рабочӧйясӧс, крестьянаӧс)! Отсыштӧй Германияса рабочӧйяслы, пальӧдыштӧй сэтчӧс нывбабаяслысь шогнысӧ, ӧлӧдыштӧй синванысӧ коньӧръяслысь — тшыгла кулысь челядьяслысь! Налы овны вывті сьӧкыд! Озыръяс дзикӧдз пӧдтӧны найӧс.

Сӧветъяслы (исполкомъяслы), профсоюзъяслы, коммунистъяслы (торъя нин шефъяслы), Союз Молодёжилы, став организациялы колӧ тайӧ лун кежлас водзвыв лӧсьӧдчыны, мед сиктъясын луныс муніс бура, ыджыда, гажаа, мед быдлаын тӧдлісны!