ГӦЛЬ МОРТ НОРАСЬӦ

Мужик пес вайӧма, мукӧд тэчӧмаӧсь

Ӧти Озёлса мужик (Визябӧж вӧлӧсьтысь, Кулӧмдінса карулын) кутчысьӧма вӧлі Сыктывдінкарса ЕПО-лы вайны 25 сыв пес. Мужикыслы лои пессӧ вайны кутчысьны невӧляӧн: зэв уна причча сійӧс суліс воддза вояснас да ӧнӧдз на эз вермы справитчыны: 1920 воын сылысь вӧвсӧ ош вӧлі косялӧма, 1921 воын мӧскыс вошӧма куканьнас тшӧтш. 1922 воын вӧлі кӧдзлӧма 10 пудовня ид да нинӧм абу воӧма, косьмӧма ставыс, лоӧма сэсся бокысь ньӧбны 60 пуд нянь — сы вылӧ вӧлі кыскӧма мужикыд 40 сыв пес. ЕПО-лы 25 сыв пессӧ мужикыд кылӧдӧма тулыснас кар улӧдз (мӧдлапӧлас тэчӧма вӧлі), ЕПО примитӧма вӧлі пессӧ. Сэсся гожӧмнас ваыд туис да вӧлі пес чипасыс киссьӧма. Ва ямӧм бӧрас, мужикыд вотӧдз на, Хлебопродукт да карса ЕПО сылысь пестӧ и тэчӧмаӧсь асланыс пыдди — 16 сыв. Мужикыд ЕПО-лысь юалас: — «Коді нӧ тэчис менсьым пессӧ?» ЕПО шуас: «Тэнсьыд пестӧ тэчис Хлебопродукт». Мужикыд сэсся Хлебопродуктлысь юалас: «Мыйла нӧ ті менсьым пессӧ аслыныд тэчинныд?» Хлебопродуктыд шуас: — «Тэнсьыд пестӧ ЕПО тэчис»...

Мужикыд ЕПО-лы вайис сӧмын 14 сыв, а 11 сывйыс эз судзсьы. Сэки карса ЕПО и шуӧ: джынсӧ пӧ (вит сыв да джын) ми ас выланым босьтам, — шуны кӧ, судзсьытӧм пессӧ юкны мужикыдкӧд шӧриӧн, — а мӧд джынсӧ пӧ дзикӧдз прӧститам... Коркӧ пӧ 5½ сывсӧ ваян... Тӧдӧ эськӧ мужикыд: найӧ сійӧ пессӧ видзисны да, мый сэсся керан, гӧль мужикыд он, буракӧ, накӧд косясь. Озыр мужикыд вайӧма вӧлі 40 сыв пес да босьтӧма 100 пуд нянь (кык пуд да джын быд сывйысь), а гӧль мужикыд сӧмын 25 пуд. Оз жӧ эськӧ ков тадзи ӧбӧдитны гӧль мужиктӧ да... Кыдзкӧ нӧ оз-ӧ позь сылы сетны кӧть 5 пуд нянь Хлебопродуктлы?

Озёлса.