КОМИ ЧУКӦР

Коми уджалысьлы колӧ ас му олӧм йылысь неуна тӧдны. Татшӧм мӧвп Питерса велӧдчысьяс коми том войтырлӧн (эз ставыслӧн — этшалӧн). Мӧвпалісны, нёшмасисны — нинӧм эз артмы. Колӧ Коми му велӧдысьяс чукӧр восьтыны; висьтавлісны гоз-мӧдысь коми велӧдчысьяслы «гижсялӧй пӧ — чукӧр лӧсьӧдам» — некод оз гижсьы. Сэсся, коркӧ январын мӧда-мӧдкӧд сёрнитӧмӧн чукӧртчисны сӧмын квайт велӧдчысь — «лӧсьӧдам пӧ, восьтам чукӧр».

Кадыс чукӧртчӧм бӧрын этша на вӧлі — найӧ эз на удитны нинӧм вӧчны, сӧмын ӧти зэв ыджыд бур позьӧ индыны — миян коми велӧдчысь войтыр пондіс гӧгӧрвоны — Коми муын уджавны оз позь коми олӧм тӧдтӧг. Чукӧрлӧн лӧсьӧдӧма дас кымын сёрни водзӧ кежлӧ, юклӧма найӧс ас костас, индӧма сійӧ сёрнияслы (докладъяслы) кадъяс. Чукӧрын шуӧмаӧсь отсавны Коми муса уджлы: учрежденньӧясӧ коми кыв сюйны — отсавны мыйӧн вермасны.

Чукӧрын сёрни кузя гижӧдъяс (протоколъяс) пондасны гижсьыны комиӧн. Гижас ӧтчыд ӧтик, мӧдысь — мӧд, мед быдӧн велалӧны комиӧн сёрнитны, гижны. Этша йӧз чукӧрын — нинӧм. Пондас удж мунны — паськалас-ыдждас чукӧр, унджык коми велӧдчысь пондас велӧдчигас ас мусӧ велӧдны.

Бур туй налы!

К.—К.