ЛЁК ОЛӦМ ПЕМЫДЛУН ВӦСНА

Ме лыдди куим приговор судлысь — куимнаныс мортӧс виӧм йылысь, виӧмаӧсь верӧсъясыс (мужикъясыс) ассьыныс бабаяссӧ.

Мый вӧсна нӧ тайӧ?..

Менам мӧвпалӧмӧн, со мый понда: миян ӧнӧдз гӧтрасьӧны важ ног, томӧн, унджыкыс оз ас вӧляысь, гӧтралӧны бать-мамыс да рӧдвужыс — корсьӧны найӧ уджалысьӧс, оз юавны нывлысь ни пилысь шы сетӧм, оз найӧ мӧвпавны: кутшӧма кутасны овны том йӧз, пондасны оз радейтны мӧда-мӧднысӧ? Гӧтрасьӧм бӧрын том йӧз кутасны омӧля овны: зык да кось пыр керкаын. Омӧля олӧны, а оз торйӧдчыны — налы мыйлакӧ лӧсьыдджык кажитчӧ вины бабанысӧ, сэсся аслыныс пукавны сыысь тюрмаын...

Пемыдӧсь найӧ, велӧдчытӧмӧсь, оз тӧдны, кыдзи колӧ овны, оз на гӧгӧрвоны, кутшӧма квайт вонад олӧмыд вежсис.

Бабаяслы-коньӧръяслы ёна омӧль олӧмыс сюрліс, ёна найӧс уджӧдлісны вермытӧм удж вылын, видлісны быд ногӧн, нӧйтлісны. Мый тшӧктыліс вӧчны мужик, баба оз лысьт вӧчтӧг кольны, висьӧ кӧть оз, нинӧм эз лысьтлы шуны — шуӧмысь бабаӧс нӧйтӧны вӧлі.

Ӧні век на пемыд сиктъясын, грездъясын бабаӧс сідз видзӧны верӧсъясыс — оз кӧсйы мужик кокньӧдны бабалысь олӧмсӧ, оз кывзыны, оз гӧгӧрвоны — гашкӧ, нывбаба ӧні вермӧ быдтор вӧчны и шуны. Нывбаба кылӧ, мый вӧчсьӧ му вылас; кылӧ, мый шуӧны сы йылысь, сійӧ шы сетӧ, паныд шуӧ верӧслы — сэтысь бабаӧс нӧйтӧны, весиг виӧны. Виӧмысь судитӧны, пукӧдӧны дыр тюрмаын. Ёна на колӧ югдӧдны коми йӧзӧс! Ёна на колӧ велӧдны коми мужикӧс и коми нывбабаӧс! Быд сиктын эм сэтшӧм мужик — ассьыс бабасӧ нӧйтӧ, омӧля видзӧ. Колӧ бабасӧ дорйыны, баба дор сулавны! Женотделлы колӧ ёна тӧждысьны пемыд сиктса нывбаба дор, югдӧдны сійӧс. Ёнджыка мед велӧдчӧм нывбабалӧн сьӧлӧмыс висьӧ аслас чой вӧсна — пемыд сиктса нывбаба понда.

Коми морт.