КОМИ ЙӦЗ ДІНӦ ЧУКӦСТЧАМ МИ
Квайт во сайын важ олӧм путкыльтчис — путкыльтчис бурлань. Бӧрӧ видзӧдлан — уна нин вежсьӧма важ оланногыс, унатор нин мӧд ногӧн лӧсьӧдӧны. Вежсис унатор коми войтырлӧн. Инда тані ӧти бур вылӧ. 1917 воӧдз коми йӧз пытшкысь этшаӧн, ӧткымын, быттьӧ «бӧрйӧм» йӧз, вермисны велӧдчыны паськыд каръясын ыджыд школаясын. Сійӧ «бӧрйӧм» йӧз пытшкысь шочыс бӧр мунлывліс Коми муӧ уджавны. Сідзикӧн Коми муын эз вӧв (дай ӧні зэв этша) коми велӧдчӧм йӧз, коми йӧз пытшкын уджалысь.
Революция восьтіс ӧдзӧс. Полӧмӧн-сорӧн, сэсся збойджыка коми том войтыр уськӧдчис велӧдчыны. 1917 восянь миян коми велӧдчысь йӧз век ӧтарӧ содӧ. Таво Мӧскуаысь, Питерысь, Перымысь, Казаньысь позьӧ лыддьыны 250 гӧгӧр коми велӧдчысь. Таво унаӧн нин помалӧны школаяс.
Сӧмын ӧти омӧль: кыз велӧдчысьыс зэв гӧль. Этшаджыкыс сӧмын стипендия вылын. Унджыкыслы велӧдчӧм костын лоӧ нянь перйыны.
Коми муӧ, коми йӧзлы быд бокӧ колӧ велӧдчӧм йӧз. Зэв эськӧ вӧлі Коми мулы бур, став велӧдчысьыс кӧ вермис ӧдйӧнджык помавны велӧдчӧм, локны коми йӧз пытшкӧ уджавны.
Шулі нин: коми велӧдчысьяс гӧльӧсь, налы отсӧгтӧг сьӧкыд велӧдчыны. Коді отсалас?
Та вылӧ висьт: коми йӧз кындзи — некод.
Кыдзи? — юаласны. Кӧть кутшӧм ногӧн — сӧмын отсӧг колӧ! Отсалан — велӧдчысьяс ӧдйӧнджык помаласны велӧдчӧм, регыдджык лоӧны уджалысьяс.
Колӧ коми Исполкомлы, быдсяма организацияяслы босьтчыны, торйӧдны ӧти вежон (недель) дай нуӧдны удж. Мед лоас коми студентъяслы отсӧг вежон.
Сійӧ вежонас позьӧ отсӧг нуӧдны став Обласьт пасьта, тайӧ ӧти туй.
Эм мӧд: Коми му гӧль, организацияяс гӧльӧсь. Сӧмын на пиын эмӧсь озыркодьяс.
Мый эськӧ сулалӧ кооперативлы (
Тайӧяс кындзи туй эм уна.
Кодлы колӧ Коми му югдӧм, коді дӧзмис пемыдын зуръявны, сылы туй оз ков индыны, сійӧ ачыс аддзас.
Отсалӧмӧн велӧдчысьяслысь позьӧ выннысӧ содтыны. Найӧ ёнджыка пондасны мӧвпавны Коми мулысь олӧм лэптыны.
Мӧдарӧ — ичӧтик отсӧг коми студентъяслы лоӧ кӧртӧд кодь, кутас кыскыны обласьтын уджавны, оз кутны пышйыны Коми муысь.
Питерса велӧдчысьяс.
