БЫД ПЕЛЬӦСЫН ЛЕНИНӦС КАЗЬТЫЛӦНЫ

Межогса гражданалӧн (Зӧвсьӧрт вӧлӧсьт улын, Емдін карулын) вӧлі январ 22 лунӧ чукӧртчылӧм кооператив йылысь сёрнитны. Вӧлі 50 морт. Сэки налы воӧма телеграммаӧн юӧр Ленин кулӧм йылысь.

Ленин олӧм йылысь да сылӧн уджалысь йӧз вӧсна тӧждысьӧм йылысь висьталісны: Митрошин, Байбородин да Колычев.

Висьталӧм бӧрын ставныс сувтӧмӧн казьтыштісны Ленинӧс да сьылісны «дзебигӧн колльӧдан сьыланкыв» (похоронный марш).

Сэсся шуисны: «Зэв шог миянлы татшӧм омӧль юӧрсӧ кывныыс. Бӧрдам — вывті жаль миянлы дона ыджыд велӧдысьным. Ленин став олӧмсӧ ассьыс пуктіс уджалысь йӧзӧс озыръяс кипод улысь мездӧм вылӧ. Ленин эновтіс миянӧс... Но ми тӧдам: сылӧн велӧдӧмыс, сылӧн веськыд туйыс коли — сійӧ некор оз быр».

— Мед век кежлӧ кольӧ Ленинлӧн памятьыс, ми ассьыным школанымӧс кутам шуны «Ленин нима школаӧн». Сэсся мед регыдджык быдӧн вермасны мунны Ленин пасйӧм туй кузя, ми ЕПО-сянь кутам сетны 10% (10 ур быд шайтысь) быдлунся барышысь йӧзӧс велӧдӧм вылӧ.

— Корам асланым карувса (Емдінса) Уисполкомӧс миян ыджыд шог йылысь нимӧдны Ставреспубликаса Народнӧй Комиссаръяс Сӧветӧдз.

Кооператив «Ильич».

Отса (Емдін карулын) кооперативлӧн январ 25-ӧд лунӧ вӧлі собранньӧ. Сэні казьтылісны Владимир Ильич Ленинӧс да шуисны: Отса (Коквицкое) ЕПО-лы сетны татшӧм ним: — «Кооператив Ильич».