ОТСАЛАМ ГЕРМАНИЯСА РАБОЧӦЙЯС ЧЕЛЯДЬЛЫ

Служащӧйяс Областнӧй Судысь, Прокуратураысь да Исправдомысь (тюрмаысь) ставныс ӧтпырйӧ гижсисны шленъясӧ Германияса рабочӧйяс челядьлы отсасян обществоӧ (Лига помощи детям германских рабочих). Найӧ асланыс собранньӧ вылын шуисны:

— Германияса рабочӧйяслӧн челядьыс ӧні олӧны зэв лёка, дзик пикӧ воӧмаӧсь, тшыгла кулӧны, кыдзи миян Россияын (Волга дорын) кувлісны 1922 воын. Налы отсӧг виччысьны некытысянь, огӧ кӧ ми отсалӧ. Германияса рабочӧйяслы ми уджйӧзаӧсь — найӧ кыдз-мый вермисны отсавлісны миянлы воддза тшыг воад. Ӧні миянлы колӧ водзӧснымӧс мынтыны налы. Миянлысь отсалӧм Германияса рабочӧйяс оз вунӧдны!

Отсыштамӧй, коми йӧз, коньӧръяслы — тшыгла кулысь челядьыслы! Мед германияса рабочӧйяслӧн оз быр дзикӧдз вынныс асланыс озыръяскӧд вермасьныыс!

Сыктывдінкарса 2-ӧд десятаса нывбабаяс собранньӧ вылын шуисны:

— Ми тӧдам сьӧкыд олӧмнысӧ германияса рабочӧйяслысь, найӧ челядьлысь. Ми кӧсйысям: кыдз-мый вермам, кутам налы отсавны!

Мед эськӧ, бур аньясӧй, кӧсйысьӧмныд оз жӧ весь ло! Отсӧг колӧ ёна, ӧнісянь, дзик пыр. Кутшӧма нӧ ті отсалінныд ӧнӧдз?