ЛЕНИНӦС КОМИ ЙӦЗ ОЗ ВУНӦДНЫ

«Югыд туй» газет лэдзанінӧ (Редакцияӧ) став Коми му пасьталаысь воӧны гижӧдъяс, кутшӧма мунӧма Ленин кулӧм йылысь собранньӧяс, митингъяс. Тайӧ лунъясӧ воисны: Визинса, Нёбдінса, Кебраса, Поёлса Союз Молодёжисянь, Айкинасянь став гражданасяньыс.

Быдлаын шуӧны ӧтитор:

— Ленин вӧлі ставмувывса уджалысь йӧзлӧн велӧдысь, нэм чӧжыс сійӧ тӧждысис рабочӧйясӧс да крестьянаӧс мездыны озыръяс улысь. Ленинлӧн велӧдӧмыс некор оз вун. Ёнджыка топӧдчам Коммунист партия бердӧ да Ленин знамяӧн, Ленин индӧм туй кузя мунам водзӧ!