ОТСАСЬӦМ КУТІС ЧИННЫ

Сыктывдінкарын йӧзыд первойсӧ медъёна босьтчылісны отсавны лэбалан машинаяс (Воздушный Флот) вӧчны — мӧда-мӧд вежмысьт вӧлі жертвуйтӧны коді мыйта вермас сы вылӧ.

Бӧръя кык тӧлысьнас отсалӧм кутіс пыр вочасӧн чинны. Ӧні сэсся дзикӧдз кусі. Быттьӧкӧ ми чукӧртім нин сьӧмтӧ уна аэроплан вылӧ, позьӧ сэсся и шойччыштны...

Оз ков кусӧдны отсасьӧм! Ми чукӧртім став сьӧмсӧ толькӧ на ӧти аэроплан борд вылӧ. Сійӧ — зэв этша! Ми, Сыктывдінкарса йӧз, мукӧдысь ёна бӧрӧ колим отсасьӧмнаным. Мукӧд коми каръясын унджык чукӧртӧны: Кулӧмдін кык тӧлысьӧн чукӧртӧма 1000 шайт зарниӧн. Весиг грездъясын мунӧ ӧктысьӧм аэропланъяс стрӧитӧм вылӧ.

Миянлы колӧ вӧтчыны кӧть на бӧрся нин!

Оз ков вунӧдны: кӧть Сӧветскӧй Россия ӧні и ён, миянӧс Англия Италиякӧд ӧткодя лыддьыны шуисны, сӧмын капиталистъяс мукӧд государствоясын оз узьны — найӧ дугдывтӧг лӧсьӧдчӧны. Он ӧд тӧд, гашкӧ, регыдӧн найӧ бара уськӧдчасны Россия вылӧ. Мед эськӧ миянӧс найӧ эз суны рӧсплӧкӧн!

Войнаысь ӧприч на аэропланыд ваяс миянлы зэв ыджыд пӧльза — овмӧс-эмбур кыпӧдігӧн. Та йылысь ёна нин гижлім газетъясӧ, колӧ нин быдӧнлы тӧдны.

Регыд Сыктывдінкарын лоӧ отсасян лун («день помощи Воздухофлоту»). Корам карса йӧзӧс кыдз-мый вермасны отсыштны.

Дугдывтӧг, пыр колӧ отсавны. Та сайын миян ыджыд вын.