ВЫЛЬ НОГӦ КУТЧЫСЬӦЙ!

Тадзи велӧдіс вӧчны Ленин

Важ лёк, пемыд оланног киссис. Октябрса Революция ставсӧ мӧдарӧ бергӧдіс. Рабочӧйяс крестьянакӧд дорӧны выль, югыд, долыд олӧм.

Ӧні, Ленин кулӧм бӧрын, уджалысь йӧз ещӧ ёнджыка босьтчисны олӧмсӧ лӧсьӧдны. Быд пельӧсын став республика пасьтала кылӧ гӧлӧс:

— Ленинлысь велӧдӧмсӧ некор огӧ вунӧдӧй! Мунам Ленин индӧм туйӧд!

Унатор аслас вежӧрнас сетіс миянлы ыджыд велӧдысь — Ленин!

Медъёна тшӧктыліс сійӧ велӧдчыны, югдӧдчыны, мездысьны пемыдысь.

Кӧнсюрӧ и Коми муын нин тшӧтш кылыштӧны ичӧтика Ленин туй кузя восьлалӧм шыяс.

Тӧрытъя газетын ми печатайтім выль пӧлӧс «пыртчӧм» йылысь — «Октябрина» йылысь. Мый нӧ лоӧ «Октябринаыс»?

Октябрина нимсӧ лӧсьӧдӧма попъяс «крестины» пыдди, Октябрса революция кузя. Октябрина лоӧ выль чужысь мортӧс пыртӧм выль обществоӧ — революционнӧй обществоӧ.

Вичкоын кагатӧ пыртігӧн быдсяма пежсӧ и тешсӧ вӧчӧны попъясыд: купельӧ тюльгыласны, сьӧласясны, пӧлясясны, гӧграласны, мавтасны, быд ногыс кикимеритчасны. Вичкоын пыртігӧн нинӧм гӧгӧрвотӧм кагаӧс мырдӧн гижӧны веруйтысьӧ. Вежай-вежань кӧсйысьӧны «ен» водзын: быдтыны кагатӧ «енмысь» полысьӧн — шуны кӧ, пемдӧдны выль мортӧс чужӧмсяньыс. Да-й поплы сет козин!..

Октябрина дырйи некутшӧм кикимеритчӧм абу. Чукӧртчасны выль ногӧн олысьяс, сетасны кагалы кутшӧмкӧ революционнӧй ним, кӧсйысясны кагаӧс быдтыны бура, мед сыысь лоӧ мӧдысь югыд, сюсь вежӧра морт. Оз ков некодлы мынтысьны, ещӧ кодкӧ босьтчас кагасӧ дӧзьӧритны верстьӧавтӧдзыс (шефство). Сьыласны, ворсасны, висьтавласны, зэв долыд, гажа, нимкодь быдӧнлы!

Со Кунибын (Визин карулын) вӧлӧма Октябринаыд да, сэтшӧма кажитчӧма нывбабаяслы, весиг унаӧн шуӧмаӧсь:

— Ме эськӧ тадзи жӧ вӧчи да, абу тӧдсаӧсь меным коммунистъясыс...

Татчӧ оз и ков тӧдса коммунистъяс. Октябрина вермасны вӧчны весиг дзик коммунистъястӧг, колӧ сӧмын мывкыдыд да ас вӧляыд!

Кулӧмдінын беспартийнӧй крестьянка вӧчӧма Октябринатӧ. Сылысь юалӧмаӧсь: он нӧ пов йӧзысь, шуны кӧ кутасны:

— Тэнад пӧ кагаыд некрещенӧй?

— Веськодь йӧз сёрниыд меным, — шуӧма бабаыд. — Ме ола ас вежӧрӧн!

Со кыдзи колӧ! Оз ков повны ни, яндысьны ни.

Колян вӧскресенньӧӧ Сыктывдінкарын вӧлі Октябринаыд. Школа стӧрӧжикалысь писӧ «пыртісны» выль ногӧн.

— Кыдзи нӧ тэ кӧсъян шуны питӧ? — юалісны мамыслысь.

— Кутшӧм ним сетасны татчӧ чукӧртчӧм йӧзыс, — воча шуис мамыс.

Сетісны ним Владимир, Ленин кузя.

Та вылӧ миянӧс велӧдліс Ленин. Тайӧ ногӧ кутчысьны ӧні югыд олӧмыс ачыс велӧдӧ йӧзтӧ.

Тырмас нин веглясьны, сьӧласьны-пӧлясьны купельяс водзын! Колӧ овны выль ногӧн!

Нолтӧ, Коми му, пыркнит ас вывсьыд став лёк сьӧд олӧмсӧ да босьтчыв выль югыд олӧм кыпӧдны!

Мед унджык лоӧ Коми муын Октябринаыс!

Октябрина позьӧ вӧчны быдӧнлы: эн ну кагатӧ пыртны поплы — со и Октябрина! Купельын пыртӧмысь, ӧти пӧлӧс «мироӧн» сё кагаӧс мавтӧмысь, ӧти паньӧн «дарйӧдӧмысь», ӧти рузумӧн вом доръяс чышкӧмысь некутшӧм «святӧй дук», быдсяма пӧлӧс висьӧмысь кындзи, оз кӧвъясь!

Ёнджыка паськӧдӧй, мед гӧрд Октябринаяс кымыньтасны сьӧд няйт купельяс!

Гижалӧй, кӧні вӧчасны Октябринаяс, ми газетӧ пасъям!