ПРОНЬДОРЫН

(Емдін карулын)

Нажӧткаяс абу.

Миян йӧз шуӧны: таво лоӧ кувны нянь вӧсна да турун вӧсна. Ид кӧйдысъяс уналӧн нин быралӧма. Нянь нажӧвитны некыдз. Вӧлӧсьт миян бокын трактӧвӧй туйсяньыс. Кодъяслӧн нянь-сов эм, найӧ быдӧн келалӧны вӧрын, нажӧвитчӧны вӧрса прӧмысӧн. Мукӧдыс мунӧмаӧсь вӧрӧ нёль вежон кежлӧ. Уна морт гижсьӧма шпал вӧчны да кыскыны катищӧ вылас, сизим верст сайсянь.

Шпал лэдзӧны крестьяна делянкаысь.

Ӧні крестьяна костын ыджыд маета: шпалыс лэдзсьӧ крестьяна делянкаясысь (леса местного назначения), крестьяна сійӧ вӧрсӧ жалитӧны: миян пӧ вӧрыс ылысмӧ дай этшаммӧ, а сыкӧд пӧ орччӧн, войладорас, вӧрыс бурджык, сэтысь пӧ и колӧ выльысь клеймитны вӧрсӧ шпал лэдзӧм вылас. Клеймитігкостіыс шпал вӧчан пӧраыс кольӧ, дай уджныс водзӧ оз мун. Нажӧтка шпал вӧчтӧг абу. Сортовка Проньдорса вӧлӧсьтлы абу жӧ. Крестьяна матӧ дзик воӧмаӧсь.

Вӧр пилитан завод колӧ помавны.

Оланног таво Проньдор вӧлӧсьтын сьӧктӧма. Крестьяна оз тӧдны, мый вӧчны. Мукӧдыс шуӧны: колӧ пӧ став овмӧс вузавны да заводӧ мунны уджавны.

Проньдор деревняын вӧр пилитан завӧд асьныс крестьяна стрӧитны мӧдлісны. Этша нин и колӧ вӧлі помӧдз эштӧдны, да лёк олӧмысла эз вермыны. Кӧрта кӧлуй босьтны колӧ вӧлі, да каръясын донаӧсь, асланыс крестьяналӧн абу. Тайӧ завод вӧсна крестьяна ёна тӧждысьӧны.

Виттор Миш.