КРЕСТЬЯНИН!

Водзвыв ассьыд эмбуртӧ страхуйт — долыдджыка олан!

Мед эськӧ крестьяналы бурджыка (унджык) лои мынтысьӧмыс быдсяма приччаысь, Государственнӧй Страхованньӧлӧн Главнӧй Правленньӧыс лӧсьӧдӧма февраль 1-й лунсянь кокньыдджыка ас вӧляысь (добровольное) страхуйтӧм: стрӧйбаяс сотчӧмысь да скӧт кулӧмысь.

Татшӧм страхуйтӧмыс со кыдзи лоӧ:

Кокниа страхуйтӧм праваыс сетсьӧ быдӧнлы, кодъяс олӧны сиктъясын-грездъясын.

Гижӧдъяс (заявленньӧяс) татшӧма страхуйтчӧмысь таво босьтсьӧны февраль 1-й лунсянь май 31-ӧд лунӧдз. Позьӧ гижны быдӧнлы ӧткӧн-ӧткӧн, позьӧ и ӧтувтчӧмӧн, артельӧн. Кор гижӧ ӧтка морт, государственнӧй страховка улӧ босьтсьӧ эмбурыс страхӧвӧй сбор мынтӧмсянь. Кор артельӧн — гижӧд босьтан лунсяньыс.

Медбӧръя строкыс татшӧм страховкалӧн тырӧ январ 1-й лунӧ лун шӧр кадын, сы бӧрын сэсся тайӧ страховка оз кут лыддьысьны.

Татшӧм выль кокньӧд серти, страхуйтӧмысь ковмас мынтысьны со кыдзи: стрӧйбаясысь — 80 ур (копеек) быд 100 шайтысь (донъяласны кӧ керкатӧ 400 шайтӧ — ковмас 3 шайт да 20 ур мынтыны); кӧрт вевта стрӧйбаясысь чинтыссьӧ 10 прӧчент. Мӧсъясысь — 5½ ур быд шайтысь, вӧлысь — 9 ур быд шайтысь.

СТРӦЙБАЯСЫСЬ — донсӧ урчитны вермӧ ачыс страхуйтысь мортыс, мед сӧмын став страхӧвӧй суммаыс (окладнӧйыс и добровольнӧйыс) эз вӧв ¾-ысь вылынджык стрӧйба донсьыс (стрӧйбаыс кӧ сулалӧ оценка серти, примернӧ, 400 шайт, оз позь сійӧс 300 шайтысь вылӧ страхуйтны) да мед тайӧ кокньӧд (льготная) страховкалӧн суммаыс оз ло куим мындаысь унджык окладнӧйсьыс (окладнӧйыс кӧ, шуам, 100 шайт, льготнӧйыс мед эз вӧв 300 шайтысь вылынджык).

СКӦТЫСЬ — донсӧ урчитӧма нин добровольнӧй страховка дырйи. Вӧвъяслы, кодъяс эз сюрны окладнӧй страховка улӧ, быд губерняын ӧткодь оценка сетсьӧ — 25 шайт.