ЧЕЛЯДЬӦС ОЗ КОВ НӦЙТНЫ

Ёна мырсьытӧг, дӧзьӧриттӧг немтор оз быдмы. Босьтам пуктас, нянь. Градъяс дінын тулысбыд ноксьыны лоӧ; потшны, небзьӧдны, вынсьӧдны, пуктыны, сэсся киськавны, весавны гожӧмбыд. Сэки вӧлись позяс виччысьны бур пуктас, сёянтор. Няньыд сідз жӧ: ёна кӧ мутӧ дӧзьӧритан: небзьӧдан, вынсьӧдан — бур нянь воас.

Быдманторъясӧс кӧ сэтшӧма колӧ дӧзьӧритны, морттӧ быдмигас нӧшта нин ёна колӧ дӧзьӧритны. Бать-мам челядьӧс быдтӧны бур вылӧ, бур виччысьӧны наысь. Сідзкӧ, колӧ вердӧм-юкталӧм кындзи унатор на.

Миянлы колӧ, мед эськӧ челядьным быдмасны да лоӧны шаньӧсь, вежӧраӧсь, сюсьӧсь, веськыдӧсь; мед эськӧ овныныс лоӧ асьнымысь лӧсьыд дай йӧзыслы, обществоыслы накӧд. Сы вӧсна колӧ челядьӧс ёна дӧзьӧритны, видзны быд омӧльысь, лёкысь. Посни челядьыд дзик жӧ рыж быдманторъяс кодьӧсь. Ёна колӧ кужны найӧс видзны. Кутам кӧ ми лёкавны, скӧравны: зургыны, чужйыны, вачкыны, найӧ быдмасны вынтӧмӧсь, лёкӧсь, висьлӧсӧсь, на помысь бур босьтӧм оз нин ло некодлы. Юръясӧ кучкалӧмысь челядь вермасны лоны юр вежӧртӧмӧсь, йӧй нисьӧ прӧсужӧсь. Мукӧддырйи ӧтчыд кучкӧмысь пельтӧммылӧны, немӧйӧ пӧрӧны. Унджык йӧйыс лоӧмаӧсь лёка видзӧм понда. Бать-мамыд челядьлы мусаӧсь, найӧ виччысьӧны пыр мелі кыв, бур кыв. Сы пыдди кӧ кутан нӧйтны, видчыны, сэки сьӧлӧм челядьлӧн лёкмас, чорзяс, бать-мам мустӧммасны.

Челядь некор оз гӧгӧрвоны лёкӧс, нӧйтӧмӧн велӧдӧм, найӧ кывзӧны сӧмын бурӧн кесйӧдлӧм. Гашкӧ, полӧмла и кывзасны син водзад, сӧмын пыр кутасны пӧръясьны, лёкавны.

Ичӧтысянь челядь сьӧлӧмӧ, юрӧ позьӧ бурӧс и омӧльӧс сюйны, наысь сёйысь моз позьӧ быдтор вӧчны.

Челядь гырысьлысь велӧдчӧны омӧляс и бурас. Быдтам кӧ челядьӧс нӧйтӧмӧн да видӧмӧн, найӧ быдмасны да асьныс сідз жӧ кутасны мукӧдӧс видзны. Гырысь преступникъяслӧн — морт виысьяслӧн, грабительяслӧн — челядьдырся олӧмныс унджыкыслӧн вӧлӧма вывті омӧль: нӧйтӧм, видӧм кындзи абу немтор аддзывлӧмаӧсь. Эськӧ найӧ асьныс вывті ыджыд вына сьӧлӧмаӧсь, вежӧраӧсь, да сӧмын ыджыд выныс лёкланьӧ пӧрӧма, лёка быдтӧмаӧсь. Сійӧ жӧ йӧз помысь бура быдтӧмӧн вермисны лоны эськӧ зэв бур йӧз. Эбӧстӧм, полысь челядьӧс лёкӧн быдтӧм лоӧ дзик жӧ тулысын град вывса пуктас нетшкӧм, шыблалӧм кодь. Найӧ, гашкӧ, оз лёкмыны, оз кутны водзӧс босьтны быдмасны да, сӧмын коньӧръяс кодьӧсь, шудтӧмӧсь, шыасьтӧмӧсь, водзмӧстчытӧмӧсь быдмасны. На помысь бур обществолы оз ло, омӧль уджалысьяс лоӧны. Ас выланыс надеяӧн найӧ некор оз вермыны овны, выльтор, буртор на помысь оз артмы.

Со мый понда челядьӧс оз ков некор нӧйтны.