ТШЫГЛА КУЛАМ! ОТСЫШТӦЙ!

Татшӧм гӧлӧсӧн горзӧны Германия пасьта сэтчӧс рабочӧйяслӧн челядьыс. Сьӧлӧмӧдз йиджӧ миянлы налӧн ымзӧмыс. Сідзи-й пуӧ вирным — бырӧдны Германияса озыръясӧс, кодъяс вӧсна мыжтӧм челядьыс сэні тшыгла кулалӧны.

Миян Россия вывті неважӧн на (1922 воӧ) муніс тшыглуныд. Некод на эз вунӧд, мыйта йӧз пышйылісны Волга дорысь, мыйта йӧз кулісны тшыгла. Волісны унаӧн и миянӧ — Коми муӧ. Кодлӧн сьӧлӧмыс эз жугыльтчыв висьталӧмъясысь, кутшӧм страсьт тшыгъялысьяс вывті мунлӧма! Кулӧны вӧлі мунігкості, семьяыс сёйӧ вӧлі кулӧм морт яйсӧ, мамъясыс вӧлі начкалӧны ассьыныс пиянсӧ...

Коми йӧз, мыйӧн вермисны, отсалісны коньӧръяслы, кылісны налысь нора кевмысьӧмсӧ, эз вештыны налысь милӧстинала чургӧдӧм кияснысӧ, ӧлӧдыштісны посни челядьлысь курыд синваяссӧ.

Ӧтвылысь став йӧз отсӧгӧн миян Россия мездысис татшӧм лёк пӧраысь. Ми вермим бырӧдны тшыглун.

Ёна, зэв ёна отсалісны сэки миянлы Германияса рабочӧйяс! Кымын вагон нянь найӧ мӧдӧдісны Волга дорӧ асланыс ичӧтик нажӧтка вылӧ! Кымын нянь кусӧк найӧ мырддисны асланыс тшыг нисьӧ пӧт челядьлысь да ыстісны миянӧ, мед эськӧ тшыгла эз кувны Волгадорса челядь!

Ми тайӧ бур вӧчӧмсӧ — Германияса рабочӧйяслысь отсӧгсӧ вунӧдны огӧ вермӧ! Найӧ ӧні асьныс сюрисны тшыглы кабыр улас. Найӧс вывті ёна топӧдӧны буржуйяс, дзескӧдӧны, нартитӧны. Озыръяслы нимкодь: пиньнысӧ жерйӧдлӧмӧн найӧ видзӧдӧны, кыдзи тшыгла кулалӧны рабочӧйяслӧн челядьыс...

Отсаламӧй, вайӧ, коньӧр челядьлы!

Миян став республика пасьта лӧсьӧдалӧма Германияса рабочӧй челядьлы отсасян Общество (рочӧн шусьӧ: Лига помощи детям германских рабочих). Быдӧнлӧн сьӧлӧмыс чеччӧ — кӧсйӧны отсавны, водзӧссӧ мынтыны Германияса рабочӧйяслы.

Коми мулы тшӧтш колӧ чукӧстчыны!

Мамъяс, батьяс! Тіянлы тӧдсаджык, матынджык челядьлӧн страдайтӧмыс. Тіян вылӧ медъёна ми надейтчам восьтавны сэтшӧм Комитетъяссӧ Коми му пасьтала! Ті медвойдӧр чукӧстчанныд ыджыд мог вылас. Гижсялӧй шленъясӧ тайӧ Обществоӧ, отсалӧй водзӧ сэні бура удж нуӧдны!

Ӧтувтчӧм уджалан Комитетъяс (Месткомъяс)! Ӧтвылысь пырӧй ставныд тайӧ Обществоас! Кыпӧдӧ, чуксалӧ мукӧдсӧ. Босьтчылӧй уджавны! Чукӧртӧй мый верманныд асланыд союзъяс пыр. Вӧчалӧй спектакъяс, рытъяс, пайкыштӧй мыйта верманныд жалованньӧысь. Туйдалӧй та вылӧ тӧдса (подшефные) вӧлӧсьтъяснытӧ!

Став граждана! Чукӧстчӧй Германияса рабочӧй челядь горзӧм шыӧ!

Сыктывдінкарын тайӧ Общество шленъясӧ позьӧ гижсьыны: Обпрофсоветын да Обженотделын. Шленскӧй взнос — 5 ур зарниӧн.