ЛЕНИНЛЫ ПАМЯТНИКЪЯС СУВТӦДАЛАМ!

Ленин куліс... Быри миян костысь медыджыд велӧдысьным. Но сылӧн велӧдӧмыс эз кув. Лыдтӧм-тшӧттӧм уджалысь йӧз костын век кежлӧ кольӧ сылӧн памятьыс, вунӧдлытӧг сійӧс кутасны казьтывны быд пельӧсын став му пасьтала.

Ӧні став Республика пасьта уджалысь йӧз чукӧртӧны сьӧм Ленинлы памятникъяс вылӧ. Коді мый вермӧ, сетӧ сы вылӧ.

Миянлы, коми йӧзлы, оз ков кольччыны мукӧдысь. Ленин миянӧс мездіс кык пӧлӧс сьӧктӧдысь: озыръяс кипод улысь да мырдӧн рочӧ пӧртӧмысь.

Кӧнсюрӧ Коми муын лӧсьӧдчӧны нин памятникъяс сувтӧдны: Визинын шуӧмаӧсь — Май 1-й лун кежлӧ лэптыны.

Колӧ: быд карын мед вӧлі Ленинлы памятник, быд грездын весиг. Медыджыд памятниксӧ колӧ сувтӧдны Коми му сьӧмӧсас — Сыктывдінкарӧ!

Коми войтыр! Чукӧртӧй, ӧктысьӧй быдлаын Ленин памятник вылӧ. Мед быдлаын Коми му пасьтала кылӧ вӧлі ӧти гӧлӧс:

— Ми лӧсьӧдам памятник Ленинлы!

— Мед миянын кыпӧдчӧ вӧлі Ленинлӧн памятникыс. Мед пыр вӧлі ми аддзам Ленинӧс; сійӧ нэм чӧжыс вермасис миян шуд вӧсна, индаліс миянлы веськыд туй, сійӧ велӧдӧм кузя ми вермим ставсӧ!

— Мед Ленинлӧн памятникыс чуксалас выль йӧзӧс (грядущее поколение) дугдывтӧг вермасьны бур олӧм вӧсна, помавны сылысь заводитӧм уджсӧ, мездысьны озыръяс кипод улысь!

Коми йӧз! Энӧ вунӧдӧй Ленинӧс! Сувтӧдамӧй сылы памятникъяс.

Миян газет лэдзанінӧ (Редакция) позьӧ вайны сьӧмтӧ Ленинлы памятник вылӧ. Кодсюрӧсянь воис нин сьӧмтор мыйкӧ мында!