КӦРТКЕРӦС

Кӧрткерӧс ловъя, оз узь. Партияын, Комсомолын эмӧсь сюсь, уджалысь йӧз. Налӧн уджыс мунӧ Нардом пыр. Нардомын быд рыт йӧз: кор собранньӧ, кор мыйкӧ висьталӧны, кор спектакль. Том йӧз волывлӧны ёна. Пӧрысьджык йӧз пыравлӧны гежӧдджыка: налӧн рытнас узьсьӧ.

Профсоюз омӧля уджалӧма. Январ 9-ӧд лунӧ вӧчлісны собранньӧ, шуисны пальӧдчыны. Кӧсйисны волывлыны велӧдчыны партийнӧйяскӧд политграмотаӧ. Сэсся шуисны комиӧн лыддьысьны‐гижны велӧдчыны. Велӧдны тшӧктісны велӧдысьӧс Быстровӧс.

Январ 12-ӧд лунӧ чукӧртчывлісны нывбаба делегаткаяс. Делегаткаыс ставыс 45 морт. Налы висьтавлісны: «Мый сетіс нывбабалы Октябрса революция», «Кыдзи Сӧвет власьт мырсьӧ крестьяналысь эмбур босьтчӧдны.» Кывзісны бура. Шуисны водзӧ кежлӧ чукӧртчывлыны быд вӧскресенньӧӧ. Делегаткаяс ёна тшӧктӧны асьнысӧ велӧдны. Шуисны быд вежонын кыкысь волывлыны велӧдчыны. Куим рыт велӧдчисны нин.

Январ 14-ӧд лунӧ вӧлі крестьяналӧн ӧтчукӧртчывлӧм (конференция). Пукалісны морт сё кымын. Докладъяс кывзісны бура, унатор юасисны. Норасьӧны, кер лэдзӧмысь пӧ нажӧтка омӧля воӧ, весиг бура кынӧмпӧт оз шед.