ВОМЫНЫН

(Кулӧмдін карулын)

Вомынын зэв омӧль олӧм.

Исполкомӧс кӧ босьтам — сэні нинӧм абу бурыс. Удж нуӧдысьясыс сэтшӧмӧсь жӧ. Газетъяс воласны да йӧз пытшкас оз и разӧдлыны. Крестьяна шуӧны, мый пӧ миянлы коми газетсьыс, огӧ пӧ и лыддьыныыс кужӧ. Юралысьясыс оз видзӧдлыны газетас, кысь нин эськӧ йӧзлы лыддьыны да висьтавны.

Школа эм да сыысь «бур». Ӧти велӧдысьыс роч. Вомынса зэв радейтӧны рочьястӧ... Крестьяна шуӧны: «Ми пӧ тупкам школасӧ, кутасны кӧ комиӧн велӧдны.» (Ог тӧд, мукӧд школаясын кыдзи велӧдӧны). Тані велӧдысьяс нырнысӧ некытчӧ оз петкӧдлыны. Ӧти спектак челядькӧд эз на вӧвлы, йӧз пиысь найӧс он аддзывлы. Найӧ кутчысьӧмаӧсь сӧмын челядьӧс велӧдны (ёна велӧдӧны!), а йӧзӧдз ичӧт мог. Ӧти доклад йӧз пытшкын оз вӧчлыны.

Школа Вомынсалы бур кӧйдыс оз сет, оз отсав югдӧдны налысь пемыд юрнысӧ!

Самӧкур юӧмысь некод оз петитчы. Юр нуӧдысьыс Исполкомын рӧштво праздникъяс дырйи гажӧдчыштіс жӧ — аслыныс партияӧ чукӧртчӧмаӧсь да сідз юӧны...

Том йӧз, пӧрысьяс, нывъяс, челядь, ставыс шатлалӧны, быттьӧ вывті ыджыд тӧлысь.

— Самӧкурыс пӧ и югдӧдлас миянлысь олӧмсӧ, мый нӧ пӧ сэсся миян эм долыдлуныс! — шуӧны йӧзыс.

Нянь таво Вомынын зэв омӧль, ӧні сэсся и муналісны: коді кер лэдзны, коді шпал вӧчны, коді заводӧ.

Коммунист партия абу. Эм сӧмын том йӧз чукӧр (ячейка Р.К.С.М.). Эм да мый, йӧзыс оз и тӧдны сы йылысь. Шленъяс тані зэв омӧльӧсь, нинӧм на тай эз уджавлыны ӧнӧдз-а, водзӧ кӧ оз босьтчыны.

Кывтыдпомын бурджыка олӧны.

Вомынын эм Кывтыдпом, дзик торъя. Сэні и йӧзыд мӧд пӧлӧсӧсь: сюсьӧсьджык, вежӧраӧсьджык, велӧдчӧм йӧз унджык, да-й водзӧсӧ велӧдчысьыс унджык. ЕПО-ыд бурджыка уджалӧ и.

Рӧштвокӧд паныд рытнас и вичкоын сьылігӧн Нардомын вӧлі вывті гажа. Висьталісны докладъяс: кыдзи лои му, енлы веритӧм йылысь, кыдзи лои морт. Сэсся спектак пуктісны — «Куим Исус». Спектак бӧрын висьталісны коми стихъяс, вӧліны асланыс лӧсьӧдӧмъяс. Сьылӧмыс йӧзлы зэв сьӧлӧм вылас воис. Асъя ӧбедня кост кежлӧ коли кык висьталӧм: енлы веритӧм йылысь да кыдзи лои морт. Сэки бара зэв уна йӧзыд чукӧрмис.

Вӧчисны тайӧ бурджык шленъясыс (чл. яч. Р.К.С.М.), кодъяслысь самӧкурыс абу на тшыкӧдӧма юр вежӧрнысӧ. Унджык эськӧ татшӧмыд!

Бикинь.