ВЫЛЬГОРТЫН

Январ 27-ӧд лунӧ Выльгортса гражданалӧн вӧлі скод. Сэні вӧчисны со кутшӧмторъяс:

Ленин кулӧм йылысь.

Владимир Ильич Ленин кулӧм йылысь шуисны: пӧратӧг водз кулӧмыс революция нуӧдысь, веськӧдлысь ыджыд мортлӧн — В. И. Ленинлӧн — вӧрзьӧдіс сьӧлӧмсӧ ставмувывса рабочӧйлысь да крестьяналысь. Сійӧ вӧлі туйдысь мынтӧдчыны уджалысь йӧзлы быдсяма дзескӧдысьясысь. Талун, сійӧс дзебан лунас, шуамӧй: мед лоас помтӧм, оръявлытӧм топыда ӧтувтчӧм став рабочӧйяслӧн крестьянакӧд помӧдз мынтӧдчыны озыр кипод улысь. Владимир Ильичлысь кыпӧдӧм гӧрд пассӧ (красное знамя) коммунист партия туйдӧдӧмӧн нуамӧй помӧн вермытӧдз озыръясӧс! Мед олас коммунистическӧй Интернационал!

Омӧля школа шонавлас.

Школа ломтӧм йылысь: пес гражданалысь бурӧн корны керка лыдӧ, гижсьӧдӧмӧн кодъяс кӧсйысясны вайны.

«Бурӧн» корӧмнад да гижсьӧдӧмнад зэв на этша вайлісны пестӧ. Ме чайта, ӧні на сідзи лоас. Школаыд лыддьысян керкаыдкӧд (изба читальня) ломтытӧг на кольласны.

Видз-му мерайтны.

Видз-му мерайтӧм йылысь: локтан тулысын мерайтны став видз-мусӧ бӧрйӧм йӧз пыр, быд десятаысь 5−7 мортӧн.

Крестьяналы коланторъяс.

Комитет Взаимопомощи йылысь: чукӧртны нянь быд керкаысь 5 тувйӧн. Чукӧрмас пуд сё кымын.

Мельнича стрӧитӧм йылысь: стрӧитны «турбинаӧн» (ваӧн уджалан машина). Вӧчны смета. Корны вӧр дон мынтытӧг. Вайны вӧрсӧ ӧні жӧ, туй тшыктӧдз.

Урӧд кага.

Выльгортын ӧти бать-мамлӧн кольӧм вежонын чужӧма урӧд кага, пи. Кымынкӧ лун мысти кулӧма. Кагаыслӧн пӧ шуйга сойыс гырддза выйӧныс абу, мӧд киас сӧмын водз чуньыс, мукӧдыс пӧ ӧдва тӧдчӧны, тшӧкаыс вомсьыс ёна пыдын, шыасьны ни сёйны абу вермылӧма, гаддьыс пӧ зэв ыджыд. Бать-мамыс дзоньвидза йӧз. Мый понда лоӧма сэтшӧм урӧдыс — оз тӧдны. Дерт, буракӧ, мамлӧн сьӧкыда уджалӧмысь.

Колӧ нӧбасян нывбабаяслы ёна видзчысьны сьӧкыд уджъясысь, сьӧкыдторъясысь — медся нин бӧръя кык тӧлысьнас.