АНЫБЫН

Крестьяналӧн чукӧртчылӧм

Январ 25-ӧд лунӧ вӧлі Аныб вӧлӧсьтувса крестьяналӧн чукӧртчылӧм (конференция). Вӧлі 150 мужик да 30 нывбаба. Сёрнитісны со мыйяс йылысь:

Мый вӧчсьӧ став му вылын. Та йылысь висьталіс Кулӧмдінса Партия Комитетысь ыстӧм ёрт Булышев. Чукӧртчӧм йӧз шуисны: ошкыны ассьыным Сӧвет власьт, коді дугдывтӧг тӧждысьӧ сувтӧдны олӧмсӧ уджалысь йӧзлысь. Ми вӧчам, дорам ассьыным власьт, мед миянысь ставмувывса озырыс полӧ, а миянкӧд сьӧд уджалысь йӧзыс радлӧны миян овмӧс кыпӧдӧм вылӧ. Тшӧктам Коммунист партиялы нуны миянӧс жуглыны, путкыльтны озыръяслысь вынкутӧдсӧ.

Та бӧрын воис Мӧскуасянь зэв шог юӧр: кулӧма миян дона велӧдысь В. И. Ленин. Тайӧ телеграмма лыддьӧм бӧрти Булышев йӧзыслы висьталіс, кыдзи чужӧма-овлӧма тӧв. Ленин. Йӧзыс шуисны: тайӧ шогыс эськӧ миянлы зэв ыджыд да, оз сувтӧд водзӧ уджалӧмысь. Ми ёнджыка топӧдчам Коммунист партия бердӧ да мунам помӧдз Ленин индӧм туй кузя.

Земельнӧй да леснӧй законъяс йылысь висьталӧм бӧрын йӧз шуисны: тайӧ пӧ законъясыд эськӧ зэв бурӧсь да, сӧмын пӧ ми недӧвӧльнӧйӧсь миян ныр улысь вӧр нуӧмысь. Тадзтӧ кӧ кутасны водзӧ нуны, миянлы матігӧгӧрын весиг пес вӧрыд оз коль. Колӧ пӧ ылысьджык сортовка вӧр лэдзны.

Вотъяс йылысь сёрнитӧм бӧрын шуисны: сельскокӧзяйственнӧй налог ёна бур воддза налогъясысь.

Комитет взаимопомощи йылысь висьталіс т. Лобанов, йӧзыс шуисны: чукӧртны нянь куим пунтӧн морт юрысь.

Кооперация йылысь висьталіс велӧдысь, Попов. Йӧз шуисны: ӧнӧдз пӧ ЕПО уджалӧма омӧля, мед эськӧ водзӧ кежлӧ уджыс бурджыка муныс, коді вермас, мед пырасны ЕПО-ӧ шленӧ. Унджык кӧ шленыд — ЕПО-ыд чорыдджык.

Йӧзӧс велӧдӧм йылысь висьталіс велӧдысь Попов. Крестьяна кӧсйысисны, кыдз-мый вермам пӧ, отсалам школалы.

Тайӧ чукӧртчылӧм нюжаліс кык часӧдз вой шӧр бӧрын; пыр сёрнитісны, кыдзи олӧм бурджыка лӧсьӧдны. Ёна гырысь вензьӧмъяс эз и вӧв: йӧзыд гӧгӧрвоны нин кутісны, Сӧвет власьтыд пӧ збыльысь тӧждысьӧ крестьяна дор. Став сёрни эштӧм бӧрын сьылісны ИНТЕРНАЦИОНАЛ.