РЕГЫД ЛОӦ ЭЗЫСЬ ДЕНЬГА

Ми бумага сьӧмнад ёна нин мырсим. Сылӧн быд лун доныс усьӧ, некыдз он вермы видзны. Торъя нин омӧль вӧлі бумага деньгатӧ видзӧмыд деревняясын (карад ещӧ на позьӧ пуктыны кассаӧ).

Сӧвет власьт ачыс зэв жӧ ёна тӧждысис кыдзкӧ-мыйкӧ лӧсьӧдны дон усьтӧм сьӧм, да ӧнӧдз эз на вермы — вывті на гӧльӧсь ми вӧлім. Червонечьяс эськӧ петалісны да, сійӧ деревняад оз аддзывны, да-й вывті гырысьӧсь — дас шайтысь улын абу.

Регыд лоӧ сэсся миян эзысь деньга. Сылӧн доныс оз кут усьны.

Ставреспубликаса Сӧветъяс Съезд вылын т. Владимиров шуис: Народнӧй Комиссариат Финансов (коді деньга йылысь уджъяс нуӧдӧ) февраль тӧлысьын надейтчӧ лэдзны дон усьтӧм казначейскӧй пасъяс (бумага деньга, червонеч нога), сы бӧрын сэсся эзысь деньга.

Эзысь деньга лэдзӧм бӧрын оз кут тӧварыд донсявны, кутас пыр донтӧммыны.