АНГЛИЯ РОССИЯӦС ЛЫДДЬӦ ӦТКОДЬӦН

Ӧнӧдз на миянлысь Сӧвет власьтӧс мукӧд гырысь государствояс эз лыддьывны прамӧй власьтӧн, эз пыдди пуктывны. Пыр на вӧлі озыръяс шуӧны: Россияын пӧ уджалысь йӧз власьтсӧ кутӧны да, ми пӧ огӧ кӧсйӧ сійӧс тӧдны.

Сӧвет Республика сизимӧд во нин олӧ, олӧ да пыр вынсялӧ. Став мукӧд государствояс гӧгӧрвоӧны, Россия пӧ ыджыд государство, сылӧн пӧ унатор эм, сытӧг пӧ овны мукӧдлы сьӧкыд. Кодсюрӧкӧд вӧлі мунӧ нин тӧргуйтӧмъяс.

Тайӧ лунъясӧ Англия ыстіс миян Сӧветскӧй правительстволы гижӧд: Англияса правительство пӧ ӧнісянь кутас лыддьыны Сӧветса правительствоӧс Россияысь прамӧя, ӧткодьӧн, кутам пӧ овны бурӧн. Тайӧ юӧрыс — зэв ыджыд вермӧм (победа) став уджалысь йӧзлӧн. Англия — зэв ыджыд озыр государство; сійӧ кӧ миянӧс пыдди пуктіс, сэсся и мукӧд государствояс кутасны миянӧс тӧдны (признать).

Англияса газетъяс зэв ошкӧны асланыс правительстволысь татшӧм вӧчӧмсӧ, сӧмын жалитӧны: «Эз пӧ тай Лениныд вермы овны татшӧм нимкодь кадӧдзыс».