ПЕЗМӦГ

Том йӧз садьмӧны

Пезмӧгын, позьӧ шуны, том йӧз ӧнӧдз на узисны, эз вӧв некутшӧм ӧтувтчан клуб. Ӧні сӧмын пезмӧгса том йӧз заводитісны садьмӧдчыны. Сюрис ӧтик том морт, М. Киселёв, сійӧ пондіс мӧвпавны Комсомол йылысь, ӧтикӧд-мӧдкӧд кутіс сёрнитны организуйтчӧм йылысь, комсомольскӧй клуб йылысь. Унакӧд сылы лои вензьыны тайӧ удж нуӧдігӧн: том йӧз век на эскӧны (веритӧны) пӧрысь пӧчьяслы, на моз жӧ полӧны коммунистъясысь. Удж Киселёвлӧн весьшӧрӧ эз вош: сюрис квайт морт, лӧсьӧдісны комсомол. Рӧштво лунӧ найӧ вӧчлісны аслыныс праздник — «комсомольскӧй рӧштво», кӧні висьтавлісны: кыдз пансьӧма рӧштво праздникыс, кыдзи пондӧмаӧсь йӧз веритны енлы, кыдзи ачыс мортыс лоӧма му вылас да мукӧдтор йылысь. Кывзысь вӧлі бура уна. Исполкомса служакъяс тшӧтш волісны сэтчӧ, бӧрыннас ёна аттьӧ кайтісны комсомольскӧй рӧштвосӧ вӧчысьяслы.

Водзӧ, пезмӧгса том йӧз! Мед бырӧ тіян костын коммунистысь полысь йӧз, мед ӧдйӧджык воссяс тіян синныд бур олӧм вылӧ!

Карын велӧдчысь.