ВЫЛЬГОРТЫН

Бурторъяс.

Граждана скод вылын шуисны воан тулысын косьтыны «Выльгорт ув нюр», 800 десятина гӧгӧр, видз вылӧ.

Комитет взаимопомощи чукӧртіс нянь 35 кымын пуд да сьӧм 5 сюрс шайт кымын.

Лэбалан машина (ероплан) вӧчан обществолы чукӧртісны сьӧмӧн 8½ шайт зарниӧн.

Ныв-зон, 27 морт, восьтісны Союз молодёжи. Чукӧртчывлӧны сьывны, ворсны, спектак вӧчны. Шуӧны: колӧ пӧ мывкыд да сюсьлун перйыны.

Тайӧ быдӧн буртор, позьӧ ёна ошкыны.

Омӧльторъяс.

Эм со и зэв омӧльторъяс.

Якӧ Педьӧ Ӧньӧ да Ярӧ Педьӧ Мишӧ вӧлі пуртӧн сутшкалӧмаӧсь Нестор Епӧӧс. Ӧні налӧн вӧлі суд карын. Мыждӧмаӧсь найӧс.

Сэсся неважӧн, 9 час гӧгӧр рытын, Сьылапиян грездын туй вылын кодъяскӧ кватитӧмаӧсь 11 арӧса детинаӧс да шыбитӧмаӧсь юкмӧсӧ (трубаӧ). Казялӧма асывнас нин пӧльыс, лэптӧмаӧсь ӧдва ловйӧн. Гезъяс кутчысьӧмӧн кос выйӧныс пыр ваын сулалӧма, ставыс пӧ лӧзӧдӧма нин. Сэсся лэччӧдӧмаӧсь карӧ, больничаӧ. Шыбитысьяссӧ оз тӧдны.

Школаӧ ни, Исполкомӧ ни граждана пес оз вайны. Велӧдысьяс велӧдчысьяскӧд кынмӧны, тірзьӧны, дзоньвидзалунсӧ воштӧны. Буракӧ пӧ школасӧ и библиотекасӧ пестӧмла лоӧ тупкыны.

Поп чукӧртӧма гражданалысь, кывсьӧ, 200 пуд нянь, да рӧштво дырйи сеталӧмаӧсь тупӧсьӧн пуд 50. Нянь вылас пӧ, 200 пудйысь, Ӧльӧш Педьӧ пыр попыс ньӧбӧма выль керка (коромина). Кирпичсӧ пӧ пачсӧ вӧчны гусялӧма Исполкомысь. Вӧчӧма пӧ сыысь протокол, сетӧма милиционерлы дознанньӧ вӧчны. Попыд да гусясьӧ!

Союз Молодёжӧ гижсьытӧм ныв-зон медалӧмаӧсь керка, ворсны рӧштво чӧж. Ӧні мыйсӧ сэні оз керны! Быд ворсан лунысь мынтӧны 30 тув нянь: гырысь ныв-зонлысь 10 тувйӧн, поснилысь — 5 тувйӧн.

Ок, бать-мамъяс, бать-мамъяс! Эсымында нянь сетанныд весьшӧрӧ воштыны, сэсся асьныд норасяд, каньгад — нянь пӧ абу сёйны. Абу шань!