МАДЖАЫН

Мунам Ленин туйӧд!

Ленин кулӧм йылысь юӧр воӧм бӧрын менӧ да Потаповӧс Кӧрткерӧссянь ыстісны Маджаӧ, висьтавны татшӧм шог йывсьыс. Ми чукӧртім сэтчӧс крестьянасӧ, локтіс морт ветымын кымын (мукӧдыс вӧрын кер лэдзӧны). Исполкомын юралысьыс восьтіс собранньӧ. Ме сэсся сэні висьталі Ленин кулӧм йылысь: «Миян костын, мися, эз ло медбур, медсюсь мортыс, кувсьӧма миян туй индалысь, уджалысьяс вӧсна тӧждысьысь, ставмувывса уджалысь йӧзлӧн меддона да медмуса ёртыс — Владимир Ильич Ленин».

Сэки чужӧмъяс быдӧнлӧн кельдӧдіс. Сувтӧмӧн сэсся казьтылісны Ленинлысь паметьсӧ, сьылісны дзебигӧн-колльӧдігӧн сьыланкыв (похоронный марш).

Сы бӧрын ме тӧдмӧді ставнысӧ Ленин олӧмӧн. Потапов висьталіс Ленин йылысь жӧ, корис ставнысӧ мунны Ленин индӧм туйӧд. Сэсся Исполкомын юралысьыс шуис:

— Исполком кӧсйысьӧ мунны Ленин туй кузя, сідз жӧ тіянӧс ставнытӧ кора.

Крестьяна ӧтвылысь ставныс шуисны:

— Ми жалитам Ленинӧс. Сылӧн кулӧмыс — ыджыд шог миянлы. Кӧсйысям пыр мунны сійӧ индӧм туй кузя. Топыда кутчысьӧмӧн рабочӧйяскӧд кутам уджавны, мед некутшӧм враг эз лысьт кыпӧдны ассьыс юрсӧ Сӧвет власьт вылӧ. Миян сьӧлӧмысь некор Ленин ёрт оз вун!

М. К.