ВОДЗӦ МУННЫ ЛЕНИН ТУЙӦД

Кулі Ленин.

Быри му вылысь медыджыд мортыс. Ставмувывса уджалысь йӧзӧс суис зэв ыджыд шог. Быдлаын, быд пельӧсын му пасьтала уджалысь йӧз бӧрдӧны. Быдлаын сылӧн нимыс тӧдса.

Медся жаль Лениныд, дерт, миянлы — Россияса Республикаын олысьяслы.

Ленин став олӧмсӧ ассьыс пуктіс уджалысь йӧз вӧсна, сійӧ некор эз тӧждысьлы ас пондаыс. Вывті ёна уджалӧмысла, лун и вой йӧз вӧсна пессьӧмысла сійӧ и висьмис. Висис бура дыр нин — воысь дыр. Бӧръявылас вӧлі справитчӧ нин, сэсся друг 21-ӧд лунӧ тайӧ тӧлысяс паралич жугӧдіс, кулі.

Дзебисны Ленинӧс колян вӧскресенньӧӧ Мӧскуаын. Кутшӧм жаль Ленин йӧзыдлы, позьӧ думыштны со мый серти: дзебан луннас Мӧскуаын вывті шогысла вӧлі садьтӧг усьӧмаӧсь 3196 морт. Быд пельӧсын Россия пасьта дзебан кадас вӧлі вӧчӧмаӧсь манифестацияяс (ывла вылӧ петалӧмаӧсь).

Уналаын и мукӧд муясын тадзи казьтылӧмаӧсь Ленинӧс.

Весиг Сӧвет власьт вылӧ букышӧн видзӧдысьяс шуӧны: му вылын ӧнӧдз эз на вӧвлы Ленинысь ыджыд морт.

Ленин аслас сюсьлуннас, ыджыд вежӧрнас, мывкыднас кужис нуӧдны уджалысь йӧзӧс веськыд туй кузя мездысьны озыръяс кипод улысь.

Унаысь уджалысь йӧз озыръяскӧд вермасигӧн пикӧ волывлісны. Ленин ӧтнас некор эз повзьывлы, пыр индавліс уджалысьяслы веськыд туй водзӧ мунны.

Став бур вӧчӧмсӧ Ленинлысь он вермы ичӧта гижӧмӧн висьтавны. Сійӧ ӧд йӧз вӧсна уджаліс став нэмсӧ — комын квайт во!

Медыджыд бур вӧчӧмъясыс Ленинлӧн со мыйяс:

Ленин лӧсьӧдіс Коммунистическӧй партия. Сійӧ первойсяньыс гӧгӧрвоис, рабочӧйясӧс ӧтувтӧм пыр позьӧ бурджыка вермасьны озыръяскӧд, регыдджык мездыны на улысь став уджалысь йӧзсӧ.

Ленин нуӧдіс рабочӧйясӧс лӧсьӧдны Октябрса революция. Ленин лӧсьӧдіс Сӧвет власьт.

Ленин мездіс мукӧд пӧлӧс сёрниа посни йӧзӧс гырысь йӧз улысь, став уджалысь йӧзыслысь правасӧ ӧткодяліс. Со и ми, коми йӧз, ӧні ӧткодьӧсь быдӧнкӧд.

Ленин индіс туй ставмувывса коммунистъяслы ӧтувтчыны да ӧти ногӧн вермасьны буржуйяскӧд — лӧсьӧдіс Коммунистическӧй Интернационал.

Ленин висьталӧм кузя лои миян быд Сӧвет республикалӧн ӧтувтчӧм (Союз Советских Социалистических Республик).

Ленин тшӧктіс ӧтувтчыны, топыдджыка овны рабочӧйяслы крестьянакӧд (союз рабочих и крестьян). Колӧ гӧгӧрвоны: рабочӧйяс да крестьяна миян кык вок — на помын став кутӧдыс, выныс Сӧвет власьтлӧн.

Медся ёна Ленин тӧждысьліс, мед эськӧ Октябрса революциялӧн югӧрыс разаліс му пасьтала, мед эськӧ быдлаын уджалысь йӧз вермисны мездысьны лёк олӧмысь, мед эськӧ коммунист партия бердӧ ёнджыка став уджалысь топӧдчисны.

Уна буртор вӧчис Ленин.

Сійӧ вӧлі став уджалысь йӧзлы друг, бур тӧварыш. Некор эз асьсӧ вылӧ пуктыв. Быдмис рабочӧй пӧвстын да крестьяна костын, нэмсӧ уджаліс на вӧсна.

Кулі миянӧс велӧдысь, нуӧдысь, веськӧдлысь. Быри медбур тӧварыш, друг ставмувывса уджалысь йӧзлӧн.

Но сылӧн велӧдӧмыс оз кув! Нӧшта ёнджыка уджалысь йӧз топӧдчасны Коммунист партия бердӧ да водзӧ мунасны Ленин индӧм туй кузя.

Ӧні Сӧвет власьт крепыд, медлёк кадъясыс кольӧма нин бӧрӧ. Ӧтувтчӧмӧн нуӧдам Ленинлысь висьтъяссӧ (заветы) помӧдзыс!

Тадзи шуӧны став уджалысь йӧзыс му пасьтала. Тадзи шуам тшӧтш ми, коми йӧз.

Быд коми мортлы колӧ тӧдны Ленинӧс, оз ков сійӧс некор вунӧдны!

Талунъя газетысь лыддянныд Ленинлысь олӧм-вылӧмсӧ. Дерт, газетӧ ставсӧ он вермы гижны. Сӧмын тӧдмасьны позьӧ Ленинкӧд. Мӧдысьджык петасны Ленин йылысь книгаяс, сэки бурджыка, унджык позяс тӧдны ыджыд друг йылысь.