СЁСЬКА ВӦЛӦСЬТ
(Визин карулын)
Йӧз олӧны зэв гӧля. Став олысь лыдыс 400 морт кымын; муртса во гӧгӧр кежлӧ нянь тырмӧ 67-лӧн. Мукӧдыс корсьӧны бокысь: коді шом вӧчӧ заводӧ, коді шпал лэдзӧ — зэв унаӧн мунӧмаӧсь Богословӧ пес керавны.
Исполкомын ставныс тӧлка йӧз, уджалӧны бура. Ӧні неважӧн лӧсьӧдӧмаӧсь «отсасян комитет». Скод вылын шуӧмаӧсь: быд ыджыд скӧт юрӧ вайны 5 пунт сюӧн. Сэсся эм сэтшӧм жӧ комитет лавкаса шленъяслӧн, коді таво отсалӧма нин уналы. Сы серти и шуӧны — колӧ пӧ тай сійӧ комитетыс. Вот мынтӧма нин ставсӧ.
Зэв омӧля мунӧ челядьӧс велӧдӧм. Граддорын войдӧр вӧлі мӧд школа, да 22-ӧд воын тупкылісны; ӧні сэтысь ӧти морт оз велӧдчы; челядь сэні уна, ставыс кольӧны пемыдӧсь. «Кысь нӧ велӧдан: школаыс ылын, паськӧм абу мӧдӧдны челядьӧс. Вот эськӧ тані кӧ школаыс», — шуӧны Граддорса. Кыдзкӧ колӧ жӧ лӧсьӧдны, мед велӧдчасны.
Вичкодорса том йӧз омӧля нин ветлӧны войпукъясӧд, быд рыт пӧшти клубын мыйкӧ да мыйкӧ вӧчӧны, кор лыддьысьӧны, кор мый. Том йӧз кыссьӧны югыдлань, колӧ сӧмын кӧть ӧтик прамӧйджык удж нуӧдысь.
Таво кӧсйисны мерайтчыны, видз-му юкны выль ногӧн, земельнӧй закон серти, да дугдӧмаӧсь скод вылӧ волытӧмла. Сійӧ омӧль уджыд, скодъястӧ кӧ омӧля видлалӧны. Колӧ, Сёськаса граждана, волывлыны скодъяс вылӧ и вӧчны удж! Выль ног мерайтчӧмнад ӧд кокньыдджык лоӧ видз-мутӧ уджавны.
Комсомольскӧй «рӧштво».
Рӧштволань паныдсӧ вӧлі клубын сёрнияс: «Кыдзи лоӧма морт, ен и „рӧштво“». Йӧз вӧлі вель уна. Ывла стенас клубӧ ӧшлім гӧрд пӧнаръяс, ӧшиняс гижӧдъяс, вӧлі зэв лӧсьыда позьӧ лыддьыны туй вывсяньыс. Йӧз локтӧны омӧля. Кор заутрення эштіс, йӧзӧс быттьӧ клубад сюрӧн кыскисны, регыд тай тырис! Миян сэки заводитчис спектак, ворсім — «Райын», костъясас висьтавлім стихотворенньӧяс. Йӧз колины зэв дӧвӧльнӧйӧсь.
