ШОЙНАТЫЫН

(Кулӧмдін карулын)

Исполком.

Октябр тӧлысьын Исполкомӧ бӧрйисны выль шленъясӧс, веськалісны том йӧз, удж дор зіля кутчысьӧны. Важ Исполкомыс делӧсӧ вӧлі ёна эновтӧма: лои бура дыр мырсьыны-справитны.

Милицияын уджалысьяс слабджыкӧсь, колӧ эськӧ выль йӧзӧс сетны, да кытыськӧ мӧдлаысь, мед эз вӧвны Шойнатыса.

Военнӧй делӧсӧ нуӧдны колӧ жӧ индыны Инструкторлы, сытӧг оз прамӧя мунны кут.

Исполкомас кӧсйӧны восьтыны библиотека.

Вот мынтӧма нин пӧшти ставсӧ.

Велӧдчӧм.

Шойнатыын кык школа эськӧ эм да, оз став челядьыс тӧрны. Воддза воас заводитлісны выль школа лэптыны, да мыйлакӧ дугдісны: срубсӧ джынсӧ тшупӧма нин, тьӧс-плака эм и, керсӧ ставсӧ лэдзӧма и вайӧма. Шуӧны тай, поп пӧ ставсӧ дзугис. Исполкомыс ас кипод улас босьтӧма поп керкаяссӧ, попыдлы лоӧма мынтысьны сэсся Исполкомлы керкаас олӧмысь. Сы вӧсна, кайтӧны, попыд йӧзтӧ и падмӧдӧма выль школатӧ стрӧитӧмысь.

Шойнатыса, энӧ кывзӧй поплысь сӧрӧмъяс! Кутчысьлӧй выль школанытӧ лэптыны!

Велӧдысь Латкина пӧрысь нин, колӧ эськӧ сійӧс шойччӧг вылӧ лэдзны, ачыс унаысь нин мездыны корлӧма, да ӧнӧдз некод абу лэдзӧма.

Кооператив.

Общественнӧй лавка тӧргуйтӧ сьӧм вылӧ, сӧмын тӧварыс этша. Деньга дон (курс) тані аслас, мунӧ водзынджык 15−20 прӧчент.

Колян воӧ воӧма барыш нёльсё шайт кымын зарниӧн. Кӧсйӧны татысь кымынкӧ прӧчент сетны йӧзӧс велӧдӧм вылӧ. Сёрнитӧны восьтыны машиннӧй тӧварищество — окочӧйяс эмӧсь.

Дзоньвидзалун.

Ӧні Шойнатыын пистиӧн висялӧны. Кулӧма 34 морт. Став йӧзсӧ ӧні выльысь пистиалӧма. Исполком дугӧдӧма вӧлі быдсяма собранньӧяс, тшӧтш поплы не ветлыны славитны рӧштво дырйи.

Поп вичкоас служитӧм дорысь славитӧмсӧ ёнджыка жалитӧ.

Йӧзыс ас тшӧт вылӧ кӧсйӧны видзны пельшӧрӧс, лекарствосӧ кӧ сетасны прӧста.

Мукӧд пӧлӧс уджъяс.

Коммунист чукӧр да Союз Молодёжи вежон куим сайын босьтчисны велӧдчыны. Йӧзсӧ ӧні оз на лэдзны велӧдчанінас (пистиӧн висьӧм вӧсна).

Профсоюзса шленъяс босьтчисны йӧз костын уджавны, естественнӧй наукаяс велӧдны.

Сортовка лэдзӧны нин. Унджык йӧзыс вӧрын.

Пр.