СЫКТЫВДІНКАРСА БӦРЙӦМ НЫВБАБАЯСЛӦН ЧУКӦРТЧЫЛӦМ

Колян декабр тӧлысьын выльысь лои бӧрйӧма Сыктывдінкарса нывбабаясӧс делегатса собранньӧяс вылӧ. Став нывбабаыс учрежденньӧясысь да десятаясысь чукӧрмис 44 морт. Сӧмын 3-ӧд да 4-ӧд десятаысь эз вермыны весиг ӧтчыд чукӧртчывны делегаткаясӧс бӧрйӧм могысь. Та серти позьӧ тӧдны карса озырджык нывбабаяслысь (мещанкаяслысь) пемыдлуннысӧ, гӧгӧрвотӧмнысӧ; найӧ ассьыныс пачводздорнысӧ кындзи немтор оз кӧсйыны тӧдны.

Декабрса 29 лунсянь куимысь нин чукӧртчылісны бӧрйӧм нывбабаяс. Сэні со кутшӧм сёрнияс вӧліны:

Мыйла колӧ, мый сетӧ нывбаба чукӧртчылӧм (делег. собр.); германияса уджалысь йӧз челядьлы отсӧг йылысь; кооперация йылысь; ёна важӧн, медводдза йӧзлӧн кыдзи олісны нывбабаяс (первоб. ком.), ӧнія му пасьталаса йӧз олӧм йылысь.

Зэв бура, зіля волӧны собранньӧяс вылӧ десятаса бӧрйӧм нывбабаяс. Бара жӧ оз позь ошкыны учрежденньӧясысь бӧрйӧм нывбабаясӧс: найӧ 3−4 десятаса нывбабаяс кодьӧсь жӧ, дыша волӧны, оз кӧсйыны тӧдны, гӧгӧрвоны ассьыныс олӧмнысӧ, оз морт пыдди асьнысӧ лыддьыны. Бӧрйӧм нывбабаяслӧн чукӧртчылӧм овлӧ быд вӧскресенньӧӧ 12 чассянь, партбиблиотекаын (Оплеснин керкаын). Нывбабакостса удж нуӧданін (Женотдел) корӧ бӧрйӧм нывбабаясӧс волывлыны быд собранньӧ вылӧ, чуксалӧ быдӧнӧс, кодлӧн гаж петӧ олӧм йылысь быдтор тӧдны, коді асьсӧ мортӧ нин кужӧ пуктыны.

Тайӧ вӧскресенньӧӧ нывбаба чукӧртчӧм лоӧ 2 ступеньса школаын, кутасны висьтавлыны висьӧмъяс йылысь, петкӧдлыны туман. картинаяс. Татшӧм собранньӧ вылӧ колӧ волыны быд нывбабалӧн и мужиклӧн, мед кужны кутам быд висьӧмысь видзчысьны, бурдӧдчыны.

Сыктывдінкарса нывбаба костын удж нуӧданін.