КЫДЗИ ВЫЛЬГОРТСА КОЛЛИСНЫ КОМСОМОЛЬСКӦЙ «РӦШТВО»

Выльгортын неважӧн на лӧсьӧдӧма «кружок молодёжи». Сэтчӧ пырӧмаӧсь ныв-зон 27 морт. Кольӧм вежонын найӧ, бӧрйӧм морт шефсянь да кружоксӧ лӧсьӧдысь йӧз чукӧртчылісны сёрнитны «комсомольскӧй рӧштво» колльӧм йылысь. Шуисны: декабр 24-ӧд лунӧ (важ ногӧн) рытын дас часын сувтӧдны спектак, сы бӧрын гажӧдчыны том йӧзлы — йӧктыны-ворсны, сэсся асывнас (25-ӧд лунас) заутрення сьылігас вӧчны «коми асыв».

24-ӧд лунӧ рытнас йӧз зэв этша чукӧрмис, спектакасьӧмысь нюжӧдчисны асылӧдз. Заутрення звӧниттӧдзыс чукӧртчӧм том йӧз гажӧдчисны ас костаныс: сьылісны, ворсісны, йӧктісны. Мыйӧн заутренняӧ клёнгисны, йӧзыд пондісны люзьгыны‐чукӧртчыны.

Шефсянь воӧм йӧз восьтісны комсомольскӧй рӧштво: заутрення сьылігчӧж висьталісны рӧштво праздник йылысь, морт лоӧм йылысь. Сы бӧрын заводитчис спектак, ворсісны комиӧн «Куим Кристос».

Заутреннясьыд пӧшті став том йӧзыс (да и уна олӧмаджык морт) воисны спектак вылӧ. Залыс йӧзнас тырис: бергӧдчыны вӧлі он вермы. Ставныс найӧ — на пытшкын вӧлі ӧти 80 арӧса пӧль — олісны спектак вылын да коми асыв вылын помасьтӧдзыс, зэв лӧсьыда, шы ни тӧв кывзісны да видзӧдісны ворсӧмсӧ. Вичкоыд налӧн вунлі.

Коми асыв заводитчис пырысь-пыр спектак бӧрын. Сьылісны, висьтавлісны стихотворенньӧяс комиӧн и рочӧн. Кывзысьяслы сьылӧмыд, буракӧ, сьӧлӧм вылас воис: ёна кырымнаныс швачкӧдісны.

Тадзи пӧраяс коллялӧмысь, ме чайта, унджык бурыс вичкоад сулалӧм дорысь да весьшӧрӧ копрасьӧм дорысь. Сэн некод нинӧм оз гӧгӧрво, мый сӧрӧны поп-дяк.

Коми пи.