КОМИТЕТ
Миян сикт ичӧтик, пемыд; йӧз некытчӧ оз ветлыны, олӧны гуын моз. Газетъяс оз волыны; сюрас кӧ, ӧдйӧджык чигарка вылӧ. Дзик шыръяс моз олӧны.
Ӧтчыд миян Сергей Вась муніс вӧлӧсьтӧ, исполкомӧ.
— Тӧдмав быдтор, Васьӧ. Оз-ӧ отсӧг кывсьы...
Йӧз миян омӧлика судзсьӧны, пыр на важ моз олӧны, суседлы отсыштӧм оз овлы, асьныс оз сетчыны выль ногӧн видз-му уджалӧмӧ. Быдӧн видзӧдӧны ас дор, артельтчӧм абу. Мукӧддырйи видзӧдан да, йӧз шогыд эськӧ сідзи-й пырӧ синмад да, оз быттьӧ аддзы некод, бокӧ бергӧдчӧны.
Ветліс Сергей Васьӧ вӧлӧсьтад. Рытнас воӧма. Ми ставным сы ордӧ чукӧртчим, юасям:
— Но мый, кыдзи. Висьтав.
Сьӧлыштіс миян Васьӧ джоджас, сапӧгнас чышкис.
Ёрччӧ, ӧтарӧ мать лэдзӧ! Ми синъяснымӧс сы вылӧ дулӧдім, нинӧм огӧ гӧгӧрвоӧ.
— Мый нӧ, мися, Васьӧ? — юасям. — Кутшӧм юӧръяс вайин, мыйяс кывсьӧ?
— Энӧ нин сёрнитӧй!.. Шабаш, овсис олӧмъяс!
Да ӧддзис, да ӧддзис ёрччыны, ызгӧ керка тырнас. Ларӧ Кузьма сэтчӧ неуна и скӧрмис:
— Висьтав, Васьӧ, лючки. Мый сэтшӧма ыззин?
— Овсис олӧмъяс, кувны ставнымлы лоӧ! — бара шуӧ Васьӧыд.
— Мый нӧ сідз? Отсӧг тай нӧ вӧлі кывсьӧ...
— Нинӧм виччысьны. Эштӧма ставыс. Карын воссьӧма комитет, ог тӧд эськӧ кутшӧм комитет да, уна пӧлӧс комитет ӧд ӧні воссьӧ да.
Сэтшӧма миянӧс повзьӧдіс Сергей Васьӧ. Ӧтчыд ӧти ног шуас, мӧдысь — мӧд ног, дзикӧдз дзугис. Муні сэсся ме Савӧ Лазар ордӧ, сійӧ, мися, гашкӧ, висьталас. Лазарыд ачыс ружтӧ паччӧр вылас, лихорадка босьтӧма:
— Висьтав пӧ, кутшӧм комитет нин бара лоӧма? Али бара кутасны развёрстка перйыны?
— Ме, мися, ачым сійӧн тэ ордӧ локті. Сергей Васьӧ висьтавлӧ: «Овсис пӧ олӧмъяс, комитет пӧ карын воссьӧма», лючки висьтавны оз вермы.
Бӧрвылас сэсся вӧлисти тӧдмалім. Вӧлӧм карсянь ыстӧмаӧсь бумага, тшӧктӧны восьтыны
— Омӧлик Комитет пӧ тайӧ. Татшӧм Комитетыд пӧ миянлы оз ков!
Зык лэптісны. Мӧсей Ласей кулакнас воны кутіс секретарыд вылӧ:
— Тэ пӧ миянлы вай нянь морт дас пудйӧн кымын, сэки пӧ сэсся и шу Комитеттӧ. Ёна нин пӧ быдсяма комитетъясӧн миянӧс кӧмӧдлінныд.
Ог тӧд, дыр-ӧ тадзи эськӧ зыксисны, да друг кыськӧ усис сэтчӧ Опонь Анна — дӧва, мужикыс гӧрд армияын вӧлі, усьлӧма война вылын. Сэтшӧм лэчыд баба. Заводитас кӧ кодкӧдкӧ вензьыны, он бара небось вен! Быд мужикӧс венас ачыс. Сувтіс исполком шӧрад дай шуӧ секретарыдлы:
— Миян мужикъяслы кӧ оз ков Комитетыд, миянлы пӧ, нывбабаяслы, колӧ. Мед найӧ пыксьӧны, ми ас ногным вӧчам!
Мужикъяс сэтчӧ ёнджыка скӧрмисны:
— Ланьт пӧ, Анна, эн вывті больгы, тӧдам пӧ тэнӧ!
А сійӧ сэтчӧ ачыс ӧддзис ёнджыка, шенасьӧ кияснас, дзик оратор моз.
— Ті пӧ тӧданныд, дай ме пӧ тіянӧс тӧда.
Вензисны-вензисны тадзи, дай муналісны, разӧдчисны. Сэсся и дзикӧдз вуні сёрниыд комитет йывсьыд. Мыйсӧ оз шулы нывбабаыд да, ладнӧ. Коркӧ-некоркӧ кывсьыны кутіс: Опонь Анна пӧ митинг вылӧ бабаясӧс чукӧртӧ, собранньӧ вӧчӧ. Казьтылӧны Комитет восьтыны. Видзӧда кӧ, менам бабуньӧй тшӧтш ноксьӧ Аннакӧд. Сэсся ӧтчыд, вӧскресенньӧӧ, баба босьтіс тувйысь менсьым гачӧс, ёкмыльтіс, сюйис киня улас дай — марш ӧдзӧсӧд! Дерт, шуны кӧ, гачыс эз нин эськӧ выль вӧв, да ӧд сійӧ менам, аслам. Вӧтӧді пос помын, куті киӧдыс:
— Кытчӧ нуан менсьым гачсӧ?
Менам Пекла ньӧтчыд нинӧм меысь гусьӧн эз нулы.
— Лэдз пӧ, Лука. Тэныд, шуӧ, татчӧдз ичӧт мог!
Ме сідзсӧ абу эськӧ лёк морт, а ӧні скӧрми, Анна вылӧ ёнджыкасӧ, тӧда ӧд, сійӧ ставсӧ мутитӧ.
— Кыдзи нӧ, Пекла, абу меным мог? Гачыс ӧд тайӧ менам?
Кӧсйи нетшыштны. Пекла жбыркнитіс туй вылӧ. Мыччис кывсӧ, нерӧ менӧ, перйис киня увсьыс менсьым гачӧс да юр водзас бергӧдлӧ:
— Со, шуӧ, босьт, на!.. Прӧщай сэсся тэнад гачлы! На окышт!..
Ок, ёна жӧ ме сэки и скӧрми! Кӧсйи вӧтӧдны да лязвартны туй вылас. Кыдзкӧ сэсся эг жӧ, лун шӧр луна, мися, улича шӧрын абу лӧсьыд гозъялы косясьны; час, мися, воас да, сэки дӧвкйӧдла.
— Кутшӧм сэтшӧм права лоӧма бабаяслы, мужикъяслысь гачьяс кытчӧкӧ новлыны?
Некор на ме татшӧма эг скӧрмыв.
Пекла воис. Шпыннялӧ.
— Кытчӧ менсьым гачсӧ воштін? — юала скӧрысь. — Кӧлуй кутін таргайтны?
А Пекла менам сувтіс джодж шӧрӧ дай заводитіс висьтавны:
— Кыдзи тэныд абу яндзим, Лука? Ми ӧд огӧ на жӧ сэтшӧм гӧля олӧ, ӧти гачшой вӧсна огӧ на рӧзӧритчӧ. Тэнад ӧд куим гач на коли, кык выль вышивайтӧм дӧрӧм. Йӧйталан гачшой вӧсна, йӧзсӧ шызьӧдан.
Дыр тадзи меным шуаліс. Яндзим лои аслым. Серам петӧ. Збыльысь ӧд, гачшой вӧсна огӧ гӧльмӧ. А Пекла сідзи-й пырӧ сьӧлӧмӧдз, кывъясыс сідзи-й ляскысьӧны. Висьталіс, Комитет пӧ восьтӧмаӧсь. Ме норми, аслам киӧн сэсся выль вышивайтӧм дӧрӧмӧс сеті — дзикӧдз сыліс сьӧлӧмӧй! Ме сідзсӧ абу эськӧ скуп морт, да пыр жӧ сэтшӧм модаыд эм: видзны быдтор пыдынджык, топыдджыка кутны. Дзик быттьӧ менӧ шондіӧн шонтіс бабуньӧй. Сеті дӧрӧм — этша, мыйкӧ, мися, нӧшта колӧ. Тупӧсь джын нянь шӧрышті.
— На, мися, Пеклуш, босьт, ну!
Пекла — Анна ордӧ. Ме тшӧтш, окота видзӧдлыны. Керка пелькиник; бабаяс, нывъяс — тырыс. Пызан вылын кык вурсян машина. Вурӧны, шӧралӧны. Зэв гажа! Менӧ сералӧны:
— Тэ пӧ, Лука, миян енлы он юрбит, мун пӧ мужикъяс дінӧ!
Миян вӧлӧсьтын эмӧсь бура уна мам-батьтӧм челядь; кӧмтӧмӧсь, пасьтӧмӧсь.
Опонь Аннаыд и мӧвпыштӧма налы отсавны.
— Со, — шуӧ, — Лука, миян Комитетыд уджалӧ нин. Тіян нӧ кӧні? Ок, ті мужикъяс!
Яндзим меным лои. Бергӧдчи, аддзи лабичсьыс ассьым гачӧс. Босьті киӧ, петкӧдла:
— Мый верма тай, отсала и ме. Со тайӧ гачсӧ ме тіянлы сеті.
Бабаяс вак-вак серӧктісны сэтчӧ. Анна матыстчис ме дінӧ, шуӧ:
— Кывзы, Лука, удж зэв уна, отсавны быдлаӧ колӧ, ми ӧтнаным огӧ ставсӧ вӧчны слӧймӧ. Тӧдан Лутӧ Марьяӧс?
— Тӧда.
— Керкасӧ аддзылін сылысь? Кильчӧ поскыс киссьӧма. Ачыс Марьяыс висьӧ, челядьыс, коньӧръяс, тшыг ни пӧт олӧны. Мый нӧ видзӧдӧ тіян комитетыд? Колӧ оз отсыштны Марьяыдлы?
— Колӧ. Кыдзи нӧ отсышттӧг?
Войбыд син эг куньлы. Сідзи-й сулалӧ син водзын Марьялӧн керкаыс, чургӧдӧма быттьӧ кияссӧ да кевмысьӧ: «Отсыштӧй меным!» Збыльысь ӧд, думайта, Аннаыд веськыда висьталіс. Огӧ кывзӧй ми бабаяслысь висьталӧмтӧ, кӧть ёна веськыда мукӧдторсӧ шуасны, быдӧн сьӧлӧм вылад оз ло лӧсьыд.
Аскинас зэв водз чеччи, доддялі Каркоӧс да муні Марьялы отсасьны. Кильчӧ пос справитім. Пес да турун вайим, Лавер мельничаӧ ветліс изӧдчыны. Зэв долыд лои сьӧлӧм вылын. Киясным эз гылав миян тайӧ отсӧгысь, косканым ёна эз сюй.
Бӧрвылас вӧлӧсьт кузя менӧ да Аннаӧс кутісны комитетъясӧн шуны. Мунам туй кузя, горзӧны:
— Со кык Комитет мунӧны!
Ми огӧ дӧзмӧ. Опонь Анна сӧмын шпыньмунас да шуас:
— Чӧвлы, Лука, уна на бур вӧчам йӧзлы водзӧ!
