МЫЙ ЛОӦ ТРАКТОР

Унаысь кывлам ми, му пӧ уджалӧны ыджыд машинаӧн, шусьӧ тракторӧн.

Кутшӧм нӧ сійӧ тракторыс, кыдзи сійӧ уджалӧ?

Тракторъяс эмӧсь уна пӧлӧс. Эмӧсь руӧн (парӧн) уджалӧны, эмӧсь — газӧн уджалӧны, эмӧсь — электричествоӧн уджалӧны. Видзӧдлам кымынкӧ тракторӧс, кыдзи найӧ уджалӧны.

Парӧвӧй трактор «Фаулерлӧн». Тайӧн со кыдзи уджалӧны. Кык трактор сувтӧны му дорӧ, ӧтар-мӧдар бокас. На костӧд нюжӧдӧма ён гез (канат). Гезъяс кӧрталӧма ыджыд, уна амыся плуг. Гӧригӧн плугсӧ первой сувтӧдӧны ӧти трактор дінас, мӧд тракторыс заводитӧ гезсӧ быдмавны дай кыскӧ плугсӧ асланьыс. Кор плугыс воас, кыкнан тракторыс ичӧтика водзӧ муныштасны (плуг пасьтаыс), плугтӧ мӧдарӧ бергӧдасны, сэсся сійӧс кыскас бӧр воддза тракторыс. Сы бӧрын тракторъяс бара водзӧ муныштасны, плуг бергӧдасны, бара кыскас канатнас мӧд тракторыс, тадзи пыр тайӧ тракторъяс уджалӧны.

Трактор-гусенича. Тайӧ бурджык трактор. Тайӧ дзик танки кодь, кодъяс тай война дырйиыд вӧлі жугӧдӧны быдтор. Талӧн кӧлесаясыс абуӧсь, муӧдыс кыссьӧ лентаӧн, гусенича моз (вегыля гаг моз), бӧрсяньыс кыскӧ сідзи жӧ ыджыд, уна амыся плуг. Вермӧ чой паныд мунны, вермӧ бӧрӧздаяс вомӧн, гуранъяс вомӧн вуджны.

Автомобиль-трактор. Тайӧ дзик автомобиль модаа. Уджалӧ со кыдзи: плугсӧ кӧрталӧны гез йылӧ жӧ (бӧрас). Тракторыс мунас ӧтар му помас дай кутас гезсӧ быдмавны, сэки плугыд и локтӧ. Кор воас плугыд дінас, трактор ӧдйӧ бӧр вуджас мӧдар му помас да сідз жӧ бӧр кыскас плугтӧ сэтчӧ.

Став пӧлӧс тракторлӧн уджалӧмыс ӧткодь: кыскавны вӧв пыдди уна амыся плуг. Америкаын ӧні эмӧсь тракторъяс, кыскалӧны комын сизим амыся плугъяс; ӧти тракторнас веськӧдлӧ ӧтик морт, мӧд морт плугсӧ лӧсьӧдлӧ; тайӧ кык мортыс ӧти тракторнас вермӧны луннас гӧрны комын гектар му (30 десятина). Та серти сэсся позьӧ нин тӧдны, кутшӧм ыджыд машина тракторыд, кутшӧм уна кокньӧд сетӧ му уджалігӧн.