КОМИ ВЕЛӦДЫСЬЯСЛЫ

Коми Обласьтувса коммунист партия удж нуӧдысь Обисполкомкӧд босьтчисны вӧчны ыджыд удж — лӧсьӧдӧны коми кывйӧн став уджсӧ нуӧдны Коми муын.

Миянлы, коми велӧдысьяслы, тайӧ уджас колӧ сьӧлӧмсянь кутчысьны. Медся матӧ колӧ сувтны коми войтыр дінӧ. Сылӧн шогыс мед лоас миян шог, гӧльлуныс — миян гӧльлун. Сувтамӧй вермасьны пемыдкӧд, тшыглункӧд, орйӧдлам Коми муысь нэмӧвӧйя чепъяссӧ, везъяссӧ — сьӧд пармаысь петамӧй паськыд туй вылӧ.

Ӧтув миянкӧд тайӧ уджсӧ босьтчасны вӧчны карувса, грездувса сӧвет удж нуӧдысьяс. Налы колӧ сьӧлӧмсянь отсавны Сӧвет власьтсӧ коми йӧз дінӧ сибӧдны. Гашкӧ, найӧ оз на тӧдны коми гижӧд. Велӧдам найӧс комиӧн лыддьысьны-гижны, туйдӧдам коми кывлысь грамматика тӧдӧдны.

Обласьтувса удж нуӧданінъясӧс комиӧ пӧртӧм комиссия миянӧс чукӧстіс...

Чукӧстчам ми. Босьтчам. Уджалам!

Велӧдысь.