МЫЙ ШУИС КОММУНИСТ ПАРТИЯ ВИДЗ‐МУ УДЖАЛӦМ ЙЫЛЫСЬ

Крестьяналысь овмӧс кыпӧдӧм вӧсна коммунист партия ёна тӧждысьӧ.

Коммунист партия Сӧвет власьтлы тшӧктӧ со мый вӧчны:

● барышӧнджык нянь вузавны заграничаӧ;

● кыпӧдны крестьяналысь овмӧссӧ, лӧсьӧдны налы кокньыда уджйӧзасьӧм банк пыр;

● отсавны крестьяналы — судзӧдны видз‐му уджалан машинаяс;

● тавосянь (1924 восянь) вотъяс босьтны сӧмын деньгаӧн. Гӧльджык крестьяналы сетны унджык кокньӧд вот мынтӧмысь;

● бырӧдны уна пӧлӧс вотъяс перйӧм деревняясысь.

Мыйла нӧ колӧ тадзи вӧчны?

Со мыйла.

Крестьянскӧй тӧварыс (главнӧйыс нянь) ӧні вывті донтӧм. Крестьяна оз вермыны асланыс тӧвар выланыс лӧсьӧдны бурджык овмӧс. Нянь дон вермас кыптыны, кор Россия няньсӧ вермас унджык вузавны мукӧд муясӧ (заграничаӧ). Та йылысь Коммунист партия колян воӧ нин шуліс. Колян во вӧлі вузалӧма 650 сюрс тонна (40 миллион пуд), таво колӧ вузавны 4 миллион тонна (250 миллион пуд).

Сэсся, мед миян няньыс вичмис вузавны унджык, колӧ кыдз-мый вермыны кыпӧдны видз-му уджалӧм: уджавны выль ногӧн, наука серти, унджык пӧлӧс кӧдзанъяс-пуктасъяс, отсавны лӧсьӧдны видз-му уджалан кӧлуй, сетны та вылӧ крестьяналы кокньыдджык условйӧӧн банкъясысь уджӧн сьӧм. Быд ногӧн отсавны, туйдыны крестьяналы восьтавны артельяс, кооперативъяс.

Сӧвет правительстволы лӧсьӧдчыны этшаджык рӧскодӧн чукӧртны вузалан няньсӧ.

Со кыдзи тшӧктӧ Коммунист партия вӧчны Сӧвет власьтлы.

Коммунистъяс тӧдӧны: крестьяна кӧзяйство помын миян Россиялӧн став озырлуныс. Сы вӧсна пыр тӧждысьӧны крестьяналысь овмӧссӧ кыпӧдӧм дор, мездыны найӧс сьӧкыд уджсьыс, медся ёна — отсавны гӧльджыкъяслы кок йылас сувтны.