ОШКА-ВИЗЯОРДАА
(манси мойд)
Олӧны-вылӧны ошка-визяордаа. Ошкыс — парма ӧти пельӧсын, визяорда — мӧдын.
Визяорда олӧ-вылӧ, нинӧмысь оз пов, пуысь пуӧ чеччалӧ, сэтчӧ-татчӧ волывлӧ. Ӧтчыд пу вывсянь сійӧ аддзӧ: кодкӧ му вывті тапикасьӧ. Визяорда котӧртіс сылань, матыстчис да аддзӧ: ош! Пансис на костын сёрни, помыс сылы абу. Сэсся-й венӧ воисны.
Ӧтиыс на пиысь шуӧ:
— Медводзӧн ме аддза шонді петӧмсӧ.
Мӧдыс оз сетчы:
— Он, ме ачым на водзджык.
(вермас ӧмӧй ичӧтик визяорда венны ошкӧс! Ошкыд ыджыд, и вежӧрыс сылӧн уна!)
Дыр вензисны найӧ, сэсся шуисны вӧчны тадзи:
— Пуксьӧмӧн кутам виччыны шонді петӧмсӧ.
Визяорда видзӧдліс гӧгӧрбок да шуӧ:
— Ме тайӧ джуджыд верӧсыслы паныд пукся.
Ош воча шуӧ:
— А ме тайӧ паськыд ыблань чужӧмӧн лоа.
(Пуксьӧй, пуксьӧй, видзӧдлам, кодныд вермаланныд!)
Пуксисны, мыджсисны ёрта-ёртыслы мышкӧн.
Дыр-ӧ пукалісны, регыд-ӧ, нинӧм оз тыдав.
И со югдыны кутіс. Восьтісны найӧ синнысӧ паськыдджыка, виччысьӧны, кодныс водзджык шонді петӧмсӧ аддзас. Сэсся визяорда кыдз тай чеччыштӧмӧн горӧдас:
— Кутшӧм нимкодь меным, ме аддза шондісӧ!
Син чашкӧдӧмӧн ош дзоргӧ ыблань: некутшӧм шонді оз аддзы. Бергӧдчыліс мышланьыс: визяорда сэтшӧм нимкодя чеччалӧ, йӧктӧ, куснясьӧ, ныр-вомсӧ вежньӧдлӧ.
Ош и юалас сылысь:
— Кытысь нӧ шондісӧ аддзан?
Йӧктігмоз, чеччалігмоз визяорда индӧ керӧс юр вылӧ да шуалӧ:
— Видзӧд, видзӧд! Зарни шонді югӧр ворсӧ сэні, керӧс йылас.
Видзӧдліс ош вывлань: ина сэні тыдовтчис шондіыд, сылӧн югӧръясысь керӧс йылыс дзирдавны кутіс. А визяорда ёнджыка на кутіс чеччавны да ышнясьны ош водзын. Ошкӧс тайӧ дӧзмӧдіс, синмас весиг веравны кутіс. Нюжӧдіс сійӧ водз кок пӧвсӧ да чабыртіс визяордаӧс шошаӧдыс. Мӧдыс мыйвынсьыс нетшыштчис, сӧмын дзоньвидзаӧн эз мынтӧдчы. Ош гыжъясыд парсыштісны сылысь мышсӧ. Мыніс ош чабырысь визяорда дай котӧртіс. Аддзис гурантор, чеччыштіс сэтчӧ, лӧньӧдчыштіс, нюлаліс вирӧссьӧм ош гыж туйяссӧ, бурдӧдчӧ. Дойясыс регыд бурдісны. Ош гыжъясысь туйясыс колисны тай, мыш кузялаыс вит пемыд визь нюжӧдчӧма.
Войдӧр визяордалӧн пасьыс вӧлі лыа рӧма, ӧні сійӧ визя лои.
Ош чабырысь мынӧм бӧрас визяорда быдторйысь кутіс повны. Кытыськӧ кӧ мыйкӧ аддзас либӧ кылас, пыр и дзебсяс пу вужъяс костӧ, пукалӧ сэні тіралӧмӧн. Сэтшӧм полысь сійӧ лои. Ӧнӧдз на тадзи олӧ.
