УНСЬЫД ПАСЬ ОН ВУР

(Коми-пермяцкӧй мойд)

Ӧти сиктын гӧтрасисны Иван да Дарья. Кӧлысь бӧрын ичмонь муніс вундыны, а Иван — гӧрны. Дарья воас ыб вылӧ, пуксяс борйӧ да и ойбыртас. Лунтыр нистас-узяс, а рытнас гортӧ воас.

— Уна-ӧ нӧ вундін? — юалӧ том гӧтырлысь Иван.

— Вунді ӧти пом, — вочавидзӧ Дарья.

Аскинас бара мунасны ичмонь гозъя асланыс уджъяс вылӧ. Дарья воас ыб вылӧ, водас борйӧ дай унмовсяс рытӧдз. Ужнайтігӧн Иван юалӧм вылӧ ичмонь бара шуӧ, ӧти пом пӧ вундӧма.

И коймӧд лун сідзи жӧ.

Видзӧдлас том верӧс ыб вылӧ, а сэні ни ӧти чумали оз сулав, ни ӧти кольта абу кӧрталӧма.

Аскинас Дарья бӧрсянь Иван гусьӧн кайис вунданінӧ, видзӧдӧ, а ичмоньыс водӧма борйӧ да узьӧ.

Иван шырис Дарьялысь юрсисӧ, чужӧмсӧ да ки-сойсӧ мавтіс сирваӧн да вӧлись муніс гӧрны.

Рытланьыс ичмонь садьмас, аддзас сирваасьӧм ки-сойсӧ, чужӧмсӧ, шырӧм юрсисӧ, чуймас да мӧвпыштас, гашкӧ пӧ, тайӧ абу ачыс.

Лэччас сиктас, локтас верӧс керка ӧшинь дінас да юалас Иванлысь:

— Иван, Дарьяыд гортын-ӧ?

— Гортын, гортын, — вочавидзис Иван.

«Но, сідзкӧ, тай збыльысь тайӧ абу ме», — шуас аслыс Дарья да мунас бӧр бать-мам керкаас.