АСНЫРА АНЬ

(Коми-пермяцкӧй мойд)

Оласны-выласны Иван гозъя. Гӧтырыс вӧлі зэв асныра. Мый кӧть верӧсыс оз шу, гӧтыр ставсӧ мӧдарӧ вӧчӧ.

Ӧтчыд найӧ мӧдӧдчисны видз вылӧ турун пуктыны. Ковмис налы вуджны ёль вомӧн. Иван вуджис да шуӧ гӧтырыслы:

— Анна, вуджигад кыкнан потш вылас тувччав, эн усь.

Гӧтыр, дерт, эз кывзысь, заводитіс вуджны ӧти потшкӧдыс. Кокыс сылӧн вильдіс, и Анна уси ваӧ. Иван уськӧдчис ваас да кутіс корсьны сэтысь гӧтырсӧ.

Муніс ёль дінті морт, аддзис ваысь Иванӧс да юаліс, мый сэні сійӧ вӧчӧ.

— Потш кузя вуджигӧн гӧтырӧй усис ваас да корся сійӧс, — вочавидзис Иван.

— Мыйла нӧ пос катыдсьыс корсян, колӧ ӧд кывтыдсьыс видзӧдавны.

— А менам гӧтыр быдтор мӧдарӧ вӧчӧ. Дерт жӧ, ёльӧ усьӧм бӧрын сійӧ оз кылав, а катӧ ва паныд, — ньӧти падъявтӧг шуис Иван.