НЫР СУЛЯН
Вир-яй юкӧнъяс нимтысь кывъяс чужлӧмаӧсь уна сюрс во сайын нин, ӧтласа финн-угор подув-кыв кадӧ, и найӧ юргӧны пӧшти ӧтмоза рӧдвуж йӧз сёрниын, шуам, син: удмуртскӧйын — син, венгерскӧйын — сэм, финскӧйын — сільмя; ки: удмуртскӧйын — ки, венгерскӧйын — кез, финскӧйын — кяси, мансийскӧйын — кяат...
Вир-яй юкӧнъяс нимтысь кывъяс лыдӧ веськалӧмаӧсь и сэтшӧмъяс, кодъяс быдлунъя сёрниысь бырӧмаӧсь нин да кольӧмаӧсь сӧмын морт вир-яй пасйысь терминъяс пыдди.
Шуам, пельпом, кӧні пом кыввуж водзын сулалӧма определение пыдди важъя пулі кыв, кодлӧн вежӧртасыс вӧлӧма ’лӧпатка’.
Сӧмын сёрнисикасъясысь ӧні позьӧ кывны пулі-сӧ, кодлӧн вежӧртасыс — ’джын’. Шуам, Изьваын: керкалӧн водз пуліыс — воддза джынйыс, Эжва йылын: порсь пулі — порсьлӧн ӧти лӧпаткаыс.
Морт вир-яй нимтан пулі кыв вочасӧн вежсьӧма рочысь пырӧм «лопатка»-ӧн, а гӧгӧрвотӧм пулі пом — вочасӧн вуджӧма пельпом кывйӧ, кӧні воддза юкӧныс збыльвывса пелькӧд некутшӧм йитӧд оз кут.
Либӧ коклябӧр, киняув, вотшлы (ключица), кӧні бӧр, ув, лы кывъяс гӧгӧрвоанаӧсь, а налӧн воддза юкӧнъясыс — определениеясыс — быд лунъя сёрниысь бырӧмаӧсь нин.
Татшӧма жӧ вежсьӧма чужӧмбаныс история чӧжӧн ныр сулян кывтэчасысь мӧд юкӧныслӧн.
Позьӧ мӧвпыштны, мый сулян кыв артмӧма сульны глаголысь, кодлӧн вежӧртасыс: ’ныр весавны’. Збыльвылассӧ тайӧ кыв форма вылас сульны глаголыс кутӧма тӧдчыны сёрӧнджык. Ныр сулян шуигӧн йӧз тӧд выланыс кутлӧмаӧсь ’ныр яй’.
Ёна важӧн коми войтыр яйсӧ нимтылӧмаӧсь сіляӧн (сыляӧн), и яй кывйыс сійӧс миян сёрниысь вежӧма сёрӧнджык нин.
Рӧдвуж финн-угор кывъясын ӧні на яйсӧ нимтӧны сіля ног: удмуртскӧйын — сіль, мордовскӧйын — сілель.
Важъя сіля кывлысь йӧлӧгасӧ позьӧ казявны талунъя коми сёрнисикасъясысь. Сідз, госа либӧ выя шыд йылысь шуӧны: шыдыс сыла.
Эм весиг коми ов — Шылашыдов, коді артмӧма сыла шыд кывтэчасысь, воддза с-ыс вуджӧма ш-ӧ бӧрынджык сулалысь ш тӧдчӧм улын, коді аскодялӧма водзынджык сулалысь с-со.
Сыла кыв збыльысь войдӧр бергавлӧма паськыда, кольӧма весиг места нимъясӧ — топонимъясӧ. Кама юлысь вожсӧ, кӧні олӧ коми войтыр, шуӧны Сылваӧн. Тайӧ ю нимсӧ учёнӧйяс гӧгӧрвоӧдӧны кыдзи ’госа ва/ выя ю/яя ва’. Сэні жӧ паныдасьлӧ и Яйю ним.
