МЫЙЛА ТАДЗИ ШУАМ?
Йӧзкостса сёрнитан кыв дугдывтӧг вежласьӧ. Эз кӧ сійӧ вежлась, эз эськӧ вермы лоны тырвыйӧ гӧгӧрвоанаӧн ставлы, эз эськӧ вермы йитны йӧзӧс, ӧд олӧмыс оз сулав ӧтилаын, а пыр сӧвмӧ: чужӧны выль сикас уджалан кӧлуйяс, артмӧны йӧз костын выль нога йитӧдъяс. Орччӧн олысь мӧд кывъя суседъяскӧд волысигӧн коми войтыр тӧдмасьӧны налӧн уджалан кӧлуйӧн, аслыссикас сёян-юанӧн, паськӧмӧн, и выль понятиеяссӧ быть нимтӧны суседын моз жӧ, налысь босьтӧм кывъясӧн.
Кывлӧн сӧвмӧмыс тыдовтчӧ оз сӧмын выль кывъяс чужӧмын, но и торъя сёрни шыяс вежсьӧмын. Тадзикӧн важъя кывъяслӧн чужӧмбаныс вочасӧн лоӧ гӧгӧрвотӧмӧн, вежӧртасныс тшӧтш заводитӧ мыйӧнкӧ торъялыштны. Тайӧ вайӧдӧ сёрнисикасъяс (диалектъяс) артмӧмӧ. Та вӧсна коми войтыр ӧтилаын шуӧны: керны, локны, вӧчны, вой, а мукӧдлаын: карны (Эжва горулын, Удораын), лакны (Леткаын), вочны (Изьваын), ой (Койгортын, Удораын) да с. в.
Вит сюрс во сайын ӧтласа финн-угор подув кыв, миян пӧльяслӧн да пӧчьяслӧн чужан кывныс, торъяліс уна пельӧ, кодъясысь сӧвмисны ӧнія венгерскӧй, финскӧй, эстонскӧй, карельскӧй, мордовскӧй, марийскӧй, удмуртскӧй, саами, коми, ханты, манси да мукӧд кывъяс.
Кӧть став финн-угор кывйын грамматикаыс да лексикаыс (медся колана кывъяслӧн запасыс) артмӧмаӧсь ӧти вужйысь, тайӧ кывъясыс сы выйӧдз торъялӧмаӧсь ӧта-мӧдсьыныс, мый ми огӧ нин гӧгӧрвоӧй важъя рӧдвуж войтырысь некодӧс, удмуртъясысь ӧтдор.
Рӧдвуж кывъяслӧн юрганногыс век жӧ матын коми шуанноглань. Кор кылан мордвалысь, марилысь, удмуртъяслысь, финнъяслысь, венгръяслысь да мукӧд финн-угор войтырлысь сёрнинысӧ, пыр жӧ юрӧ воӧ мӧвп, мый сыын уна ӧткодьлуныс комикӧд. Шуам, коми лым сылі удмуртскӧйӧн — лымы сыліз, финскӧйӧн — луми сулі, эстонскӧйӧн — луми суліс; комиӧн шуасны: ми сёйим-юим, удмуртскӧйӧн — ми сиим-юим, финскӧйӧн — ме сӧимме-ёимме; комиӧн кылам: тэ тӧдан, венгерскӧйӧн — тэ тудод, удмуртскӧйӧн — тон тодод; комиӧн: колӧ мунны, венгерскӧйӧн — кел менні, удмуртскӧйӧн — кулэ мыныны.
Коми йӧз кост сёрниын паныдасьлӧ уна сэтшӧм кыв, коді историялысь кузь вӧлӧк вуджигӧн джынвыйӧ вунӧма нин да кольӧма сӧмын кутшӧмкӧ торъя формаын, ёнджыкасӧ наречиеясын, идиомаясын, торйӧдны позьтӧм сложнӧй кывъясын.
