КОЙГОРТЫН

(Визин карулын)

218 километр сайын Сыктывдінкарсянь эм Койгорт вӧлӧсьт. Ӧтарӧ-мӧдарӧ 65 верст пасьта: сиктъяс, грездъяс — йӧзыс 2800 морт. Ӧні нинӧмӧн торъя эз мыччысьлы мукӧд вӧлӧсьтъясысь, а коркӧ, важӧн, тані вӧвлӧма Китень кар.

Ёна сэні бергӧдчывлӧма йӧз! Койгорт пыр вӧвлӧмаӧсь туй вожъяс: Из сайӧ, Сибырӧ, Яткаӧ. Сэки вӧвлӧма сэні пристань, Сыктыв кузя ёна баркаяс ветлывлӧмаӧсь (тайӧ пӧрысь йӧз тӧдӧны на).

Койгорт ыджыд грездӧ пӧртсьӧ.

Ӧні Койгортӧс пӧртӧны Ыджыд вӧлӧсьтӧ (районнӧйӧ). Медводдза уджсӧ та йылысь нуӧдны Визин карувса Исполком ыстіс татчӧ ассьыс уджалысьяссӧ (шленъясӧс).

Койгортса Исполкомыс, важ бӧрйылӧмыс, омӧля уджавлӧма, ӧнія бӧрйӧмыс бурджык лои: регыдӧн поп керкаяс босьтіс аслас ки улӧ, восьтіс сэтчӧ том йӧзӧс велӧданін, салдатӧ велӧдчысьяслы, — попыслы кык жыр кольӧма на, — колӧ эськӧ дзикӧдз ыстыны сійӧс сэтысь.

Мукӧд пӧлӧс уджъяс нуӧдӧм.

Сэсся эм коммунист чукӧр — 5 морт, дай ӧтувтчӧм том йӧз чукӧр 5 морт жӧ. Эм пельшӧр, крестьяна видзӧны (дай войдӧр пыр видзлісны) асланыс тшӧт вылӧ. Кӧть асьныс ёна тшыгъявлісны, да пельшӧртӧ век на видзлісны.

Воддза воясӧ вӧлӧсьт пасьтала вӧлі вит школа, ӧні сӧмын ӧтик. Визин карувса йӧзӧс велӧдӧм кузя удж нуӧдысь — Шеконин ёрт — кӧсйыліс эськӧ мӧд школа восьтыны да, ӧнӧдз на мыйкӧ эз восьты. Йӧз миян зэв школа дор сулалӧны: асьныс асланыс сьӧм вылӧ вӧчӧны ыджыд школа, 10 вежӧсаӧс, школа керкасӧ лэптӧма нин.

Видз-му юкисны морт лыдӧ.

Видз-му аръявылыс нин юкисны морт лыд серти. Зэв паныдасисны тайӧ удж нуӧдӧмлы: лесничӧй Маланин, Апалун Степан, Багин Петыр да ещӧ унаӧн на, налӧн муыс мунӧ да, зэв вӧлі жаль. Налы бара ёна отсавліс учитель Карманов (озыр купеч пи).

Вӧр лэдзӧм омӧль.

«Северолеслы» удж вылӧ пӧшти став йӧзыс кутчысисны. Сӧмын доныс омӧль, норасьӧны вӧр лэдзысьяс: муртса пӧ кынӧмпӧт вылӧ. Сёрниталӧны союз лӧсьӧдны вӧр лэдзысьяс, сӧмын оз сяммыны йитчыныыс. Виччысьӧны Обпрофсӧветсянь отсӧг.

Ас морт.