СТАВМУВЫВСА КРЕСТЬЯНАЛӦН ӦТУВТЧӦМ

Кык тӧлысь сайын Мӧскуаын вӧлі Ставмувывса крестьяналӧн ӧтчукӧртчылӧм (съезд). Сэні бӧрйисны Ставмувывса Крестьяна Сӧвет. Сылӧн медыджыд могыс: тӧждысьны крестьянаӧс ӧтувтны, мед наысь лоасны бура революция вӧсна вермасьысьяс мувыв буржуйяскӧд.

Сӧвет уджавны заводитіс неважӧн на, а вӧчны вель уна нин вермӧма.

Германия пасьтала чукӧртлӧма бура уна крестьянскӧй съездъяс. Ӧні сэні миллион да кыксё сюрс дорысь нин унджык крестьяна ӧтувтчӧмаӧсь ыджыд крепыд союзӧ.

Румынияын да Чехословакияын сідзжӧ уна крестьяна ӧтувтчӧмаӧсь ён чукӧрӧ.

Америкаын, Францияын уна крестьяна союзъяс кӧсйысисны революция вӧсна уджъяс нуӧдны Ставмувывса Крестьяна Сӧвет индӧм серти.

Польшаын мунӧ ӧтувтчӧм сэтчӧс крестьяна костын.

Уджыс Ставмувывса Крестьяна Сӧветлӧн паськалӧма быд государствоӧ, свет пасьтаыс. Крестьяна быдлаын садьмӧны, гӧгӧрвоӧны, колӧ пӧ озыръяскӧд вермасьны, наысь мездысьны.

Рабочӧйяс ӧні абу нин ӧтнанысӧсь. Налӧн эмӧсь ён, вына отсасьысь вокъяс — крестьяна. Крестьяна ӧтувтчасны да тшӧтш босьтчасны озыръяслысь олӧмсӧ помавны, Ставмувывса революция лӧсьӧдны.