ӦТУВЙӦН БУРА МУ УДЖАВНЫ

Пекничаӧ, 21 лунӧ декабр тӧлысьын, Кулӧмдінын (Кулӧмдінса да Керчомъяса крестьяна) чукӧртчылісны выставка вылӧ ветлысьяс. Квайт час чӧж найӧ пукалісны, сёрнитісны мӧда-мӧдкӧд выставкаын аддзылӧмтор йылысь. Бӧртинас шуисны: колӧ заводитны ӧтувйӧн бурджыка му уджавны, сы вӧсна колӧ ӧтувйӧдны крестьянаӧс. Паськӧдны му, судзӧдны машинаяс. Колӧ ӧтувтчыны артельясӧ. Тулыс кежлӧ колӧ судзӧдны кӧйдысъяс: турун, сёркни, морков, мукӧдтор, мыйӧн позьӧ шыбитны важ моз уджалӧм. Найӧ асьныс кӧсйисны висьтавлыны крестьяналы (и ӧні нин висьтавлӧмаӧсь), мый аддзылісны выставка вылысь, мый позьӧ вӧчны миянын выставка велӧдӧм серти. Колӧ бурмӧдны, гырсьӧдны скӧт (мӧс, вӧв, порсь), колӧ судзӧдны и сувтӧдны быд деревняӧ бурджык рӧд. Выставка — зэв бур школа, шуӧны крестьяна, мӧд во унаӧн зэв кӧсйӧны ветлыны выставка вылӧ.

Мед жӧ тайӧ чукӧртчылӧм выставка вылӧ ветлысь крестьяналӧн оз коль прӧстӧй чукӧртчылӧмӧн! Зіля босьтчӧй крестьяналы висьтавлыны, уджавны выставка серти. Тіян вылӧ Сӧвет власьт пуктӧ ыджыд надея.

Тун.