КРЕСТЬЯНАЛӦН ВОДЗӦС ОЗ ВОШ

1920 воӧ рабочӧйяс ёна тшыгъявлісны. Крестьяна кӧнсюрӧ отсавлісны налы. Ӧти хуторын, Богдан Краснӧйын, Донскӧй округын, крестьяна вӧлі чукӧртӧмаӧсь 8000 пуд нянь дай ыстӧмаӧсь Мӧскуаса рабочӧйяслы. Мӧскуаса Сӧвет налы шуліс, огӧ пӧ некор вунӧдӧй тіянлысь отсалӧмнытӧ. Сэки унаӧн на вӧлі Сӧвет власьт вылӧ видзӧдӧны омӧля. Унаӧн вӧлі тайӧ отсӧг вылӧ сералӧны. Сы бӧрын сэсся тайӧ Краснӧй Богдан хуторыс вӧлі еджыдъяс улын, крестьяналӧн овмӧсъяс ёна омӧльтчис. Таво арнас сэтчӧс крестьяна шыасьлісны Мӧскуаса рабочӧйяс дінӧ, оз-ӧ пӧ найӧ водзӧссӧ отсыштны. Мӧскуаса Сӧвет налы ыстіс со кутшӧм пӧдарки: 1174 аршын матерйӧ, 100 гоз кӧмкот, 1 вартан машина, 4 ящик стеклӧ, 1 трактор (ыджыд му уджалан машина) да уна посни крестьянскӧй кӧлуй.

Рабочӧйяс оз вунӧдны крестьяналысь отсӧг. Найӧ ӧтвылысь вермасьӧны Сӧвет власьтлысь вынсӧ кыпӧдны.